Աշխատում ենք մեծ ներդրումների վրա, որոնք կգան Հայաստան. Վենս
ԱՄՆ փոխնախագահ Ջեյմս Դեյվիդ Վենսը Հայաստանի Հանրապետությունից Ադրբեջան մեկնելիս «Զվարթնոց» օդանավակայանում կարճ ճեպազրույց տվեց մի քանի լրագրողների։ Անդրադառնալով ՀՀ-ում ամերիկյան ներդրումների մասին հարցին և մասնավորապես դիտարկմանը, որ նախօրեին ՀՀ նախագահական նստավայրում իր խոսքը 5 և 4 միլիարդ դոլարի մասին սխալ է մեկնաբանվել, Ջեյ Դի Վենսն ասաց, որ երեկ ստորագրել են մի քանի փաստաթղթեր, բայց նաև հանդիպումների ժամանակ աշխատում են մեծ ներդրումների վրա, որոնք կգան Հայաստան՝ «նախագահ Թրամփի և վարչապետ Փաշինյանի միջև կնքված լավ գործարքների շնորհիվ»։
«Դրանցից մեկն այն է, որ կառուցվելու է շատ մեծ տվյալների կենտրոն։ Իրականում, կարծում եմ, այն արդեն մեկնարկել է, տվյալների կենտրոն, որի ընդհանուր ներդրումը կարող է հասնել 4 միլիարդ դոլարի։ Այն նաև շատ աշխատատեղեր կստեղծի հայրենիքում ապրող մարդկանց համար։ Այսպիսով, սա դասական փոխշահավետ գործարք է։ Կարծում եմ՝ նախագիծը կարող է դառնալ 4 միլիարդ դոլար, բայց արդեն իսկ զգալի ներդրումներ են կատարվել Հայաստանում, և մենք ակնկալում ենք, որ դա կշարունակվի»,- նշեց ԱՄՆ փոխնախագահ Ջեյ Դի Վենսը։
Հիշեցնենք, որ նախօրեին ԱՄՆ փոխնախագահն ասուլիսի ժամանակ չէր խոսել ՀՀ-ում 4 և 5 միլիարդ դոլարի ներդրումների մասին։ Նա մասնավորապես ասել էր․
«Մենք նաև շատ հպարտ ենք հայտարարել, որ մեր երկրներն ավարտել են քաղաքացիական միջուկային համագործակցության 1-2-3 համաձայնագրի շուրջ բանակցությունները։ Երբ այն ամբողջությամբ հաստատվի, դա կհարթի ճանապարհն ամերիկյան և հայկական ընկերությունների համար՝ կնքելու քաղաքացիական միջուկային նախագծերի վերաբերյալ համաձայնագրեր։ Դա նշանակում է մինչև 5 միլիարդ դոլար սկզբնական ամերիկյան արտահանում, գումարած լրացուցիչ 4 միլիարդ դոլարի երկարաժամկետ աջակցություն վառելիքի և սպասարկման պայմանագրերի միջոցով»։ Նրա խոսքը պարզապես սխալ էր ներկայացվել անգլերենից հայերեն համաժամանակյա թարգմանություն իրականացնող մասնագետի կողմից։
