ՌԴ-ի և Ուկրաինայի փոխադարձ հարվածներից կան նոր զոհեր և վիրավորներ
Ռուսաստանը և Ուկրաինան շարունակել են հարվածներ հասցնել մեկը մյուսի տարածքին, երկու կողմից էլ կան զոհեր և վիրավորներ:
Այս մասին հաղորդում է BBC-ի ռուսական ծառայությունը: Ուկրաինայի ռազմաօդային ուժերի տվյալներով՝ գիշերը երկրի վրա է արձակվել 52 անօդաչու թռչող սարք, որոնցից 40-ը խոցվել է, 7 վայրերում գրանցվել են հարվածներ:
Պոլտավայում ռուսական հարվածներից 2 մարդ է զոհվել, 11-ը՝ վիրավորվել, վնասվել է քաղաքացիական ենթակառուցվածքը: Բնակելի մասնավոր տանը հրդեհ է բռնկվել:
Իսկ Օդեսայում ռուսական հարվածների հետևանքով վնասվել են բնակելի տներ, լուրջ վնասներ է կրել 9-հարկանի բնակելի մի շենք, որտեղ հրդեհ է բռնկվել:
Բնակիչները տարհանվել են: 4 մարդ վիրավորվել է:Իր հերթին, ՌԴ պաշտպանության նախարարությունը հայտնել է Բելգորոդի, Վորոնեժի, Լիպեցկի, Կուրսկի մարզերում, ինչպես նաև Ղրիմում ուկրաինական 69 ԱԹՍ խոցելու մասին: Լիպեցկում ուկրաինական անօդաչուի բեկորներն ընկել են մասնավոր տան վրա, 1 մարդ զոհվել է, 2-ը՝ վիրավորվել:
Ավելի վաղ ԱՄՆ պետքարտուղարության խոսնակ Թեմի Բրյուսը հայտարարել էր, որ ԱՄՆ-ն չի դադարեցրել Ուկրաինային զենքի բոլոր մատակարարումները: Սա «ընդամենը մեկ իրավիճակ է», նշել է նա:
Բրյուսը, վկայակոչելով պաշտպանության նախարարությունը, նշել էր, որ կան Ուկրաինային սպառազինությունների մատակարարման բազմաթիվ այլ հուսալի տարբերակներ:
Ավելի վաղ ամերիկյան ԶԼՄ-ները գրել էին, որ Պենտագոնը դադարեցրել է Ուկրաինային մի քանի տեսակի հրթիռների մատակարարումները՝ ԱՄՆ-ում սպառազինությունների պաշարների հետ կապված մտահոգությունների ֆոնին։ Նշվում էր, այդ թվում, Patriot ՀՕՊ համակարգերի համար տասնյակ հրթիռների մատակարարումների դադարեցման մասին:
Պետքարտուղարության խոսնակը հավելել է, որ նախագահ Թրամփը հայտնել է իր հանձնառությունը՝ կապված Patriot հրթիռների հետ:
