Թուրքիայում շարունակում են հերոսացնել Հայոց ցեղասպանության ոճրագործներին
Անկարայի քաղաքապետ, ընդդիմադիր «Ժողովրդահանրապետական» կուսակցության անդամ Մանսուր Յավաշն օրերս ելույթ է ունեցել քաղաքապետարանի կողմից իրականացվող ծրագրերից մեկի շրջանակում։
Յավաշը հայտարարել է, որ Անկարայում Թալեաթ փաշայի անունով հուշատախտակ են բացել։ Անկարայի քաղաքապետը Թալեաթ փաշայի նման «պետական այրերին» հիշելը որակել է որպես «պետական հիշողության» ապրեցում։
«Վերջերս մեկ այլ կարևոր աշխատանք ևս կատարեցինք։ Մեր Անկարայում՝ Թալեաթ փաշայի բուլվարում, օսմանյան պետության վերջին շրջանում ծառայած, «Միություն և առաջադիմություն» կոմիտեի առաջատար անուններից Թալեաթ փաշայի հիշատակն ապրեցնելու նպատակով հուշարձան ենք կանգնեցրել։ Ե՛վ Թալեաթ փաշայի նման պետական այրերին, և՛ հանրապետության շրջանում արտերկրում նահատակված մեր դիվանագետներին չմոռանալը նշանակում է ապրեցնել մայրաքաղաք Անկարայի պատմական շարունակականությունը, պետական հիշողությունը։ Ցանկանում եմ նշել, որ այս նախագիծը մի հուշարձան լինելուց զատ հանրության անցյալին տեր լինելու կամք է»,-հայտարարել է թուրք քաղաքական գործիչը։
Թալեաթ փաշան երիտթուրքական «Միություն և առաջադիմություն» կուսակցության պարագլուխներից է և Հայոց ցեղասպանության կազմակերպիչներից։ 1913-1918 թթ․ զբաղեցրել է Օսմանյան կայսրության ներքին գործերի նախարարի պաշտոնը։
Mansur Yavaş:
💬 Talat Paşa’nın anısını yaşatmak amacıyla bir anıt yerleştirdikhttps://t.co/eDOvlHFC9W pic.twitter.com/WEuGrE4FCH
— Independent Turkish (@TurkishIndy) May 30, 2025
