«Կա՛մ Փաշինյանը հրաժարական կտա, կա՛մ կհեռացվի. դանակը ոչ թե հասել է ոսկորին, այլ ոսկորի մեջ է արդեն». Արսեն Գրիգորյան
Հայաստանի վաստակավոր արտիստ Արսեն Գրիգորյանը հավաստիացնում է՝ Արցախի և Հայաստանի անվտանգության պահանջով օր օրի նոր թափ հավաքող բողոքի ակցիաները ստիպելու են Արցախի և Հայաստանի անվտանգությունը խաթարած իշխանության ղեկավար Նիկոլ Փաշինյանին հեռանալ։
168 TV-ի «Ռեվյու» հաղորդաշարի եթերում Արսեն Գրիգորյանը խոսելով ապրիլի կեսից Հայաստանում նոր թափ հավաքած բողոքի ակցիաների մասին՝ նաև ընդգծեց.
«Հանրային մեծ ընդվզման դեպքում մենք կհասնենք իշխանափոխության։ Մեր ժողովրդի մեծ մասը պետք է շատ լավ գիտակցի, թե այս իշխանությունը ո՞ր երկրներից է ստանում պաշտպանություն՝ Թուրքիայից և Ադրբեջանից, իսկ սա գիտակցող մարդկանց դուր չի գալիս այդ ամենը, ուստի հիմա ժողովրդի միասնականությամբ Նիկոլ Փաշինյանը հեռանալու է, և այդ մեկ անձի հեռացումով ամեն ինչ սկսվելու է։ Փաշինյանի համար ամենակարճ ճանապարհն այն է, որ ինքն իր կամքով հրաժարական տա, դա չարեց՝ հեռացվելու է»։
Ըստ Գրիգորյանի՝ երկրում ստեղծված վիճակի պատճառն ազգային և պետական հարցերում Հայաստանին և Արցախին սպառնացող անվտանգային խնդիրներն են, ու բանը հասել է նրան, որ գործ ունենք պետության քանդման հետ։
«Տեսնում եմ՝ տունս քանդվում է։ Սա ոչ թե սառնարանում մի բան չունենալու հարց է, այլ պետության. տեսնում եմ, որ բոլորիս տունն է քանդվում։ Երբ մենք մեր վիճակին նայում ենք մեր ազգային արժանապատվության տեսանկյունից, փողոցում սկսված շարժումը դառնում է 88-ի նման մի շարժում»,- ասաց նա։
Արսեն Գրիգորյանի փոխանցմամբ՝ պատերազմից հետո թմբիրի մեջ հայտնված հասարակության որոշ շերտերի մոտ արթնացում կա. այն նաև ընթացքի մեջ է, և դրա ապացույցն է այն, որ մեկ շաբաթ առաջ սկսված բողոքի ակցիաներին ամեն օր ավելի շատ մարդ է մասնակցում՝ ինչպես Երևանում, այնպես էլ՝ Հայաստանի տարբեր մարզերում։
«Դանակը ոչ թե ոսկորին է հասել, այլ ոսկորի մեջ է։ Մենք պարտավոր ենք տեր կանգնել մեր երկրին ու ազգային պետական շահերին։ Արցախի փրկություն, Հայաստանի անվտանգություն և մեր ազգային արժանապատվություն. եթե մենք այս երեք հարցին տեր չկանգնենք, կորած ենք»,- ընդգծեց ՀՀ վաստակավոր արտիստը։
Հարցազրույցի մանրամասները՝ տեսանյութում
