«72 ժամ եմ տալիս «Իմ քայլի» պատգամավորներին». Անի Սամսոնյան

168TV-ի «Ռեվյու» հաղորդման շրջանակում զրուցել ենք ԱԺ «Լուսավոր Հայաստան» խմբակցության պատգամավոր Անի Սամսոնյանի հետ

– Տիկին Սամսոնյան, երեկվա միջադեպն իշխանություններն այլ կերպ են մեկնաբանում, «Լուսավոր Հայաստանից» հնչեցին բոլորովին այլ գնահատականներ, ուղիղ եթերին հետևողներս էլ միջադեպի հետ կապված մեր հետևություններն ենք արել։ Իշխանական պատգամավորներից մեկը, սակայն, հայտարարեց, թե նախքան Էդմոն Մարուքյանի ելույթը, նա Ձեր ելույթի միջոցով էր սադրանքը նախապատրաստել: Մասնավորապես, ԱԺ փոխնախագահ Ալեն Սիմոնյանն ասել էր. «Ընտրվել է մարտավարություն, որ սկզբից իրավիճակը դահլիճում լարվում է Անի Սամսոնյանի ելույթով, որտեղ օգտագործվում են այնպիսի բառեր, ինչպիսիք են՝ «հիստերիկ» և այլն: Հետագայում դուրս է գալիս և խոսում է սադրելով, խոսում է դու-ով մի մարդ, որն օրեր առաջ սեռական բնույթի հայհոյանք է հնչեցրել: Եվ բնական է՝ երբ դու ամբիոնից իջնում ես և «վրա ես քշում» Սասուն Միքայելյանի վրա մայիս 8-ով և փորձում սադրել, մարդը կարող է նաև այդ սադրանքին չդիմանա»: Ինչպե՞ս կհակադարձեք:

– Սուտ առաջին՝ իմ ելույթի մեջ չի եղել «հիստերիկ» բառը, Դուք կարող եք այն դիտել: Սուտ երկրորդ՝ ես չեմ հիշում, որ իր ելույթի ժամանակ «դու»-ով խոսեն: Սուտ երրորդ՝ Էդմոն Մարուքյանը վրա չի տվել Սասուն Միքայելյանին: Եվ ճշմարտություն չորրորդ՝ այս միտքը արտահայտողը ստոր սուտ, զրպարտություն տարածող անձնավորություն է, բայց ես արդեն, քանի որ ակնկալիքներ չունեմ մեր գործընկերներից, դրա համար չեմ զարմանում:

Իսկ թե ինչ կատարվեց երեկ, պարզվում է՝ շատ ուղիղ կապ ունի Նիկոլ Փաշինյան-Էդմոն Մարուքյան սուրճի շուրջ զրույցի հետ: Խոսել են Արցախից և վերջում, ի հարցադրումն այն բանի, որ մեզ կասկածում են նախկինների հետ կապերի մեջ, Էդմոն Մարուքյանն ասել է՝ դուք, որ հիմա այսպես եք վերաբերվում երկրին, դուք չեք լինելու հաջորդ իշխանությունը՝ ո՛չ «Իմ քայլը», ո՛չ էլ նախկինները, հաջորդ իշխանությունը լինելու ենք մենք: Ամբողջ աշխարհում քաղաքական ուժերը միմյանց տարբեր հարթակներում ասում են, որ դուք չեք լինելու հաջորդը, այլ մենք: Սա սովորական զրույց է, բայց, փաստորեն, սկիզբ դրեց այս մեծ խայտառակության:

– Ձեր կարծիքով՝ դա էր պատճառը:

– Իմ կարծիքով՝ այո՛, դա էր պատճառը, որովհետև մենք միջադեպից հետո քննարկում էինք տարբերակներ, ասում էինք՝ եթե սա չի եղել Նիկոլ Փաշինյանի թողտվությամբ, ուրեմն՝ մեծագույն անհարգանքով են վերաբերվել իր իշխանության ներկայացուցիչները, ովքեր վարչապետի աչքի առջև հարձակվում են ժողովրդավարության վրա: Ընդդիմադիր պատգամավորի ելույթի ժամանակ հարձակվում են պատգամավորի վրա: Մեծապես հույս ունեինք, որ մեր այս վարկածը կարդարանա, որովհետև այդ քայլը պետք է դատապարտվեր և ունենար հետևանքներ:

Բայց ի զարմանս մեզ՝ Նիկոլ Փաշինյանն ունեցավ մի ելույթ, որը երկու-երեք ժամվա ընթացքում գրված ելույթ չէր: Եթե նրա ֆեյսբուքյան էջում նայեք, ելույթը վերնագրել է՝ «Երկու տարվա և եզրափակիչ ելույթ»: Այսինքն՝ այս ելույթին, որտեղ նա անդրադառնում է մեզ և միջադեպին, նախապատրաստված էին երկար ժամանակ:

– Այսինքն՝ Դուք մտածում եք, որ այս ծեծկռտուքը նախապես պլանավորվա՞ծ է եղել:

– Այո՛: Երբ փաստերը համադրում եք՝ ամեն ինչ ակնհայտ է դառնում:

– Սասուն Միքայելյանին հանձնարարե՞լ են հարձակվել Էդմոն Մարուքյանի վրա:

– Եկեք հասկանանք՝ ինչո՛ւ հարձակվեցին Էդմոն Մարուքյանի վրա. տրամաբանություն չկա դրա մեջ: Ամբիոնից Տնտեսական հանձնաժողովի նախագահ Բաբկեն Թունյանն իր ելույթում մարդկանց անվանեց «բութ» և «սրիկա»: Այն հանձնաժողովի նախագահը, որն ընդամենը մի քանի օր առաջ ամբիոնից իր հեռախոսահամարը խիզախորեն հրապարակեց, հետո տեսավ՝ քաղաքացիները շատ են օգնության համար իրեն զանգում, անջատեց և կորավ: Էդմոն Մարուքյանն այս մարդուն ընդամենը նկատողություն արեց: Այդ նկատողության վրա էլ զայրացավ Սասուն Միքայելյանը:

– «Իմ քայլը» խմբակցության ղեկավար Լիլիթ Մակունցը հայտարարեց, թե «Լուսավոր Հայաստան» խմբակցությունը ԱԺ է բերում ոչ թե՝ իր, այլ` անհասկանալի, ԱԺ-ից դուրս գտնվող «խուլիգանական խմբակների օրակարգը»։ «Եվ սա փաստ է»,- ասաց նա։ Նիկոլ Փաշինյանն էլ հայտարարեց․ «Ես ինքս իջել եմ իմ նախկին աշխատասենյակը, որտեղ այժմ պարոն Մարուքյանն է նստում, և ես ուղիղ ասել եմ, որ, այո՛, պարոն Մարուքյան, մենք բոլորս ունենք հիմքեր՝ կասկածելու, որ Դուք և Ձեր գործունեությունը, այդ ողջ հոգեբանական, բարոյական բռնությունները, ի վերջո, ֆիզիկական բռնություններ գործարկելու պլանի մի անբաժանելի մասն է»։ Էդմոն Մարուքյանն իր լայվում պարզաբանեց, թե ինչպես է եղել, բայց հետաքրքիր է՝ ինչո՞ւ են ձեզ պարբերաբար մեղադրում այլ ուժերի հետ կապերի մեջ։

– Նախ՝ տիկին Մակունցի խոսքի վերաբերյալ. ես համոզված եմ, որ տիկին Մակունցը չի ղեկավարում խմբակցությունը, այլ այն ղեկավարում է Ալեն Սիմոնյանը, և ըստ իս՝ այս ելույթը գրել է Ալեն Սիմոնյանը, որովհետև դրանք նրա բառերն են, իսկ Ալեն Սիմոնյանի մասին ես իմ կարծիքն արտահայտել եմ:

Ինչ վերաբերում է մեզ նախկինների հետ կապելուն. Եթե դուք հիշում եք՝ դաշինք կազմելուց առաջ նույն ուժը կրկին մեզ կապում էր նախկինների հետ, հետո որոշեցին մեզ հետ դաշինք կազմել: Պարզվեց, որ մենք լավն ենք, մաքուր ենք և որևէ մեկի հետ կապ չունենք:

Հետո, երբ հեղափոխություն եղավ, մենք սկսեցինք որոշ հարցերի շուրջ մեր անհամաձայնությունը հայտնել, չմիացանք հեղափոխությանը, պարզվեց, որ մենք էլի կապ ունենք նախկինների հետ:

Հետո գործադիր մարմինը վերցրին, արտահերթ ընտրություններից առաջ էլ եկան մեզ մոտ և ասացին, որ պատրաստ են իրենց խմբակցությունում տեղեր տալ մեզ, և միասին լինենք խորհրդարանում: Մենք չհամաձայնեցինք: Պարզվեց՝ այդ դեպքում էլ մենք երևի մաքուր էինք արդեն:

– Երբ միասին «Ելք» դաշինքում էիք, նման խոսակցություններ եղե՞լ են:

– Ո՛չ: Ամբողջ խնդիրն այն է, որ իրենք գիտեն, որ նման բան չկա: Եվ եթե նույնիսկ կասկածներ կային, որ մենք նախկինների հետ կապ ունեինք, արդեն երկու տարի է՝ ԱԱԾ-ն ենթարկվում է Նիկոլ Փաշինյանին, թող իր կասկածը պարզեր:

Եթե պարզել է, և չկան ապացույցներ, ուրեմն թող տարբեր ամբիոններից մեզ չզրպարտեն դրա համար:

Ես ուզում եմ ձեր եթերն օգտագործելով՝ «Իմ քայլի» պատգամավորներին ասել հետևյալը՝ եթե դուք գրառումներ եք անում, որ մենք կապված ենք տարբեր շրջանակների հետ, ուղիղ զրպարտում եք մեզ, 72 ժամ եմ իրենց տալիս՝ դա ապացուցելու համար, եթե չեն ապացուցում, կա՛մ թող գրառումները հեռացնեն, կա՛մ թող ներողություն խնդրեն «Լուսավոր Հայաստանից»:

– Տիկին Սամսոնյան, իշխանությունների այս գործելաոճը նոր չէ, հեղափոխության օրերին էլ մենք տեսնում էինք հարձակումներ Ձեր գործընկերների՝ ՀՀԿ-ական պատգամավորների վրա. Արփինե Հովհաննիսյանի, Շուշան Պետրոսյանի տուն էին գնում, Մարգարիտ Եսայանի վրա էին հարձակվում, զանգահարում էին, անհանգստացնում էին, Էդուարդ Շարմազանովի և Արմեն Աշոտյանի «թաղման արարողությունն» էին կազմակերպում՝ սև ժապավեններով և դագաղներով: Այդ ժամանակ ինչո՞ւ որպես քաղաքական ուժ՝ ձեր գնահատականը չհնչեցրիք, չե՞ք կարծում, որ դուք էլ եք ձեր լռությամբ նպաստել այս իրավիճակին:

– Անկեղծ կարող եմ ասել, որ՝ այո՛, ես իմ լռությամբ նպաստել եմ այդ իրավիճակին: Եվ այն, ինչից հիմա բողոքում են թավշյա տիկնայք, որ իրենց սպառնում են, թե կհարվածեն, կբռնաբարեն, այս ամենն իսկապես ցավալի է, բայց ինչից հիմա բողոքում են, իրենք խրախուսել են դա:

Ես չեմ արձագանքել, ես դրանով մեղավոր եմ, բայց իրենք դա խրախուսել են: Ահա թե որն է մեր տարբերությունը: Դրա համար, հիմա, երբ որևէ դեպք է լինում, ես ասում եմ՝ պետք չէ անձնավորված պաշտպանել, պետք է դատապարտել երևույթը, դա է մեզ փրկելու:

Հիմա, իշխանության ներկայացուցիչ կանանց այն ժամանակ դուր է եկել դա, որովհետև հանրապետական տիկնանց, որոնց սպառնացել են, նրանց դիմաց իրենք եղել են հերոսներ, իրենք եղել են հեղափոխական կանայք, բայց իրենք չեն մտածել, որ կյանքը բումերանգ է, և այդ ամենը հետ է գալու: Ամենավատը, գիտե՞ք՝ որն է, որ իրենք հիմա շարունակում են այդ քաղաքականությունը:

Մանրամասները՝ 168TV-ի տեսանյութում