ՄԻՊ որոշմամբ արագ արձագանքման խումբ է մեկնել Գյումրի
Մարդու իրավունքների պաշտպանի որոշմամբ ապրիլի 27-ին արագ արձագանքման խումբ է մեկնել Գյումրի երեկոյան Վարդանանց հրապարակում նախատեսվող հանրահավաքի կապակցությամբ: Այս մասին տեղեկացրին Մարդու իրավունքների պաշտպանի աշխատակազմից:
«Քաղաքացիներն ահազանգ ունենալու դեպքում կարող են զանգահարել ինչպես թեժ գծի 116 անվճար հեռախոսահամարին, այնպես էլ Շիրակի մարզային ստորաբաժանում (ք. Գյումրի, Մհեր Մկրտչյան 44, բն.46, հեռ․ +374 312 4 19 81):
Երևանում և մարզերում հավաքներ նախաձեռնելու առաջին պահից Պաշտպանի աշխատակազմում սահմանվել է աշխատանքի արտակարգ գրաֆիկ, ստեղծվել են աշխատանքային խմբեր, որոնք, ըստ մասնագիտական ուղղությունների, իրականացնում են թե՛ հավաքների շուրջօրյա դիտարկում, թե՛ այցեր՝ կապված հավաքների մասնակիցներին ոստիկանության կողմից մեկուսացնելու փաստերի հետ, և թե՛ ԶԼՄ-ների հրապարակումների ու սոցիալական ցանցերի մշտադիտարկում»,- ասվում է ՄԻՊ հաղորդագրության մեջ:
