Նադեժդա Սավչենկոյին հոսպիտալացրել են քննչական մեկուսարանից
Ուկրաինայի Գերագույն ռադայի պատգամավոր Նադեժդա Սավչենկոյին, որը ձերբակալված է պետական հեղաշրջման նախապատրաստման մեղադրանքով, ապրիլի 12-ին քննչական մեկուսարանից տարել են հոսպիտալ: Այս մասին «112 Ուկրաինա» ալիքի եթերում հայտնել է նրա քույր Վերան:
«Քննչական մեկուսարանում ինձ տրամադրած տեղեկատվությամբ՝ նրան արդեն հետազոտման են տարել քննչական մեկուսարանի կլինիկա»,- ասել է նա: Քույրը նաեւ նշել է, որ Նադեժդա Սավչենկոյի փաստաբանները նրան չեն ուղեկցել:
Ավելի վաղ Նադեժդա Սավչենկոն ինքը գանգատվել է իր վիճակի կտրուկ վատացումից, մասնավորապես, ստամոքսի խնդիրներից: Սավչենկոն մարտի 23-ին զրկվել է պատգամավորական անձեռնմխելիությունից եւ ձերբակալվել:
Հետաքննության վարկածով՝ նա ահաբեկչական գործողություններ է պլանավորել խորհրդարանի շենքում եւ կառավարական թաղամասում: Նրան սպառնում է հինգ տարվա ազատազրկումից մինչեւ ցմահ բանտարկություն, հաղորդել է ՏԱՍՍ-ը:
