«Եթե լավ պրոդուկտ ստեղծեն, ադրբեջանցիների ռեյտինգավորումը նրանց պրոդուկտի վրա չի ազդի»չեն կարող խոչընդոտել հաջողված հայկական ստարտափի առաջընթացը
Ադրբեջանցիները չեն կարող ազդել համաշխարհային շուկայում լավ արտադրանքով ներկայացած հայկական սկսնակ ընկերության հաջողության վրա: Այս տեսակետն արտահայտեց Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը` անդրադառնալով Արմենպրես»-ի դիտարկմանը, որ ֆեյսբուքյան օգտատերերից մեկը գրառում էր կատարել այն մասին, թե ինտերնետ շուկաներում հայտնվող հայկական պրոդուկտներն արժանանում են ադրբեջանցիների վատ գնահատականին, արդյունքում այդ արտադրանքի վարկանիշն ընկնում է ու ազդում դրա տարածման, պոտենցիալ ներդրողներ ներգրավելու վրա:
«Եթե լավ պրոդուկտ ստեղծեն, ադրբեջանցիների ռեյտինգավորումը նրանց պրոդուկտի վրա չի ազդի: Ցանկացած բիզնես էլ կարող է դրա հետ առնչվել, որ իր մրցակիցը վատ ռեյտինգ տա: Թող ուրեմն ստարտափերով հավաքվեն ու վատ ռեյտինգավորեն ադրբեջանցիների ստարտափերը»,-ասաց Կարեն Վարդանյանը:
Տեղեկատվական անվտանգության մասնագետ Սամվել Մարտիրոսյանի խոսքով` խնդիրը կա, ադրբեջանցիներն ամեն տեղ փորձում են վնաս տալ, նույնն էլ փոխադարձաբար անում են հայերը, բայց լուրջ ազդեցության մասին չէ խոսքը, եթե ստարտափը հաջողված է: «Իրականում, շատ խնդիրներ կան, որոնց մենք առաջինը չենք բախվում: Պատկերացնում եք իսրայելական ստարտափերը ինչ վատ ռեյտինգ են ստանում արաբների ու հակասեմական տրամադրություններ ունեցող մարդկանց կողմից: Ու ինձ թվում է անհամեմատ մեծ է քանակը: Ես իրականում նայեցի մի քանի հայկական ստարտափերի ռեյտինգները, ադրբեջանցիներ ը մեծ զանգված չեն կազմում: Եթե ստարտափը թափ է առնում, ու սկսում են ներբեռնել (200-300 ներբեռնման մասին չէ խոսքը, ավելի շատ), բացասական ռեյտինգներն այդքան լուրջ ազդեցություն չունեն»,- ասաց Սամվել Մարտիրոսյանը: Նա նկատեց նաև, որ ադրբեջանական ստարտափեր շատ դժվար է գտնել, դրա համար էլ քիչ ենք ականատես լինում հակառակ երևույթին:
