ԱՄՆ-ում կալանավորված մոտ 75 000 միգրանտներ քրեական անցյալ չունեն
Նոր տվյալների համաձայն, ԱՄՆ Ներգաղթի և մաքսային վերահսկման ծառայության (ICE) աշխատակիցների կողմից ԱՄՆ նախագահ Դոնալդ Թրամփի վարչակազմի աշխատանքի առաջին ինը ամիսներին կալանավորված մոտ 220 000 մարդկանցից մեկ երրորդից ավելին քրեական անցյալ չի ունեցել, հայտնում է NBC News-ը։
Տվյալները, որոնք ընդգրկում են ICE-ի կալանավորումները հունվարի 20-ից հոկտեմբերի 15-ը, ցույց են տալիս, որ գրեթե 75 000 դատվածություն չունեցող մարդ ձերբակալվել է ներգաղթի գործողությունների ընթացքում, որոնք, ըստ նախագահի և նրա բարձր պաշտոնյաների, պետք է ուղղված լինեին մարդասպանների, բռնաբարողների և ավազակախմբերի անդամների դեմ։
Այս թվերն այսօրվա դրությամբ Թրամփի վարչակազմի ներգաղթի դեմ պայքարի միջոցառումների առավել ամբողջական պատկերն են տալիս։ Դրանք տրամադրել է Բերկլիի Կալիֆորնիայի համալսարանը «Արտաքսման տվյալներ» նախագծի շրջանակում, որը դրանք ստացել է ներգաղթի և մաքսային մարմինների դեմ հարուցված դատական գործընթացի միջոցով։
Տվյալները հավաքում է ICE-ի ներքին բաժինը, որը մշակում է կալանքների, ձերբակալությունների և արտաքսումների վերաբերյալ տվյալները։
Հունվարից վարչակազմը դադարեցրել է ICE-ի կալանավորումների վերաբերյալ մանրամասն տեղեկատվության կանոնավոր հրապարակումները։ Ինչ վերաբերում է քրեական անցյալ ունեցող կալանավորվածներին, տվյալներում տարբերակում չի արվում նախկինում փոքր իրավախախտումներ ունեցածների և ավելի ծանր հանցագործություններ՝ ինչպես բռնաբարություն և սպանություն, կատարածների մեջ, որոնց նկատմամբ, ըստ վարչակազմի, իրականացվում է հետաքննություն։ Եվ այս թվերը չեն ներառում Սահմանային պարեկային ծառայության կողմից իրականացված ձերբակալությունները, որը ակտիվ ներգաղթի գործողություններ է սկսել մի շարք քաղաքներում, ներառյալ Չիկագո, Լոս Անջելես և Շարլոթ։
Ներկայումս Սահմանային պարեկային ծառայությունը «զտումներ» է կատարում Նյու Օռլեանում։ Սահմանային պարեկային ծառայությունն ու ICE-ը ենթարկվում են ԱՄՆ Ներքին անվտանգության նախարարությանը, բայց դրանք երկու տարբեր կառույցներ են՝ տարբեր գործառույթներով։
Սահմանային պարեկային ծառայության գործակալները սովորաբար աշխատում են հարավային և հյուսիսային սահմանների երկայնքով, սակայն վերջերս հարյուրավոր աշխատակիցներ ուղարկվել են Միացյալ Նահանգների ներքին շրջաններ՝ առանց փաստաթղթերի ներգաղթյալների հայտնաբերելու նպատակով։
