ԱՄՆ պետդեպարտամենտը դժգոհություն է հայտնել ռուս-հնդկական պայմանագրերի կապակցությամբ
Lenta.ru-ի փոխանցմամբ` ԱՄՆ-ը բոլոր երկրներին կոչ է անում հրաժարվել Ռուսաստանի հետ գործ ունենալուց: Այս մասին լրագրողների հետ ճեպազրույցում հայտարարել է ԱՄՆ պետդեպարտամենտի պաշտոնական ներկայացուցիչ Ջենիֆեր Փսակին` մեկնաբանելով Ռուսաստանի նախագահ Վլադիմիր Պուտինի հնդկական այցի արդյունքներով համաձայնագրեր ստորագրելը.
«Բնականաբար, մենք տեղյակ ենք ռուս-հնդկական համաձայնագրերի ստորագրման մասին: Մենք նախկինի նման բոլոր երկրներին կոչ ենք անում գործեր չվարել Ռուսաստանի հետ: Մենք շարունակում ենք հետևել դրան»: Փսակին հերքել է, թե դա կարող է բացասաբար ազդել նախագահ Բարաք Օբամայի պլանավորած հնդկական այցի վրա` ընդգծելով, որ Հնդկաստանը շարունակում է մնալ կարևոր գործընկեր:
Պուտինի հնդկական այցի արդյունքներով որոշվել է, որ Ռուսաստանը 20 տարում Հնդկաստանում կառուցելու է ատոմակայանների առնվազն 12 էներգոբլոկ: Բացի այդ, «Ռոսնեֆտը» պայմանագիր է ստորագրել 10 տարում Հնդկաստանին տարեկան 10 միլիոն տոննա նավթ մատակարարելու մասին:
