ՕԵԿ-ի արձագանքը. «Կարելի է կարծել, թե պարոն Շարմազանովը բացառում է քաղաքական մրցակցությունը»
Ազգային ժողովի փոխնախագահ, իշխող Հանրապետական կուսակցության մամուլի խոսնակ Էդուարդ Շարմազանովը երեկ հայտարարել է, թե ապրիլի 10-ին ՀՀ նախագահ Սերժ Սարգսյանի հայտնի հայտարարությունից հետո Հայաստանում ստեղծվել է նոր քաղաքական իրավիճակ: Նրա խոսքով` գալիք տարիներին Հանրապետականի ձայնն է որոշիչ լինելու հայաստանյան քաղաքական գործընթացներում, իսկ պետության կառավարման ղեկին հասնելու հիմնական ճանապարհը Հանրապետական կուսակցությունն է:
«Իր հայտարարությամբ Նախագահ Սարգսյանը հստակ ամրագրել է, որ պետական կառավարման ամենաբարձր օղակներում իրենց տեսնող մարդկանց համար պետության կառավարման ղեկին ձգտելու հիմնական, եթե ոչ միակ ճանապարհը Հանրապետական կուսակցությունն է: Եթե որևէ մեկը գալիք տարիների ընթացքում հավակնում է նախագահի կամ վարչապետի պաշտոնին, ապա այդ ճանապարհն անցնում է Մելիք Ադամյան փողոցով»,- ասել է Շարմազանովը:
Վերջերս իրեն ընդդիմություն հռչակած «Օրինաց երկիր» կուսակցության (ՕԵԿ) մամուլի խոսնակ Արթուր Միսակյանը 168.am-ի հետ զրույցում մեկնաբանելով Էդուարդ Շարմազանովին, ասաց, որ Եվրոպայի ժողովրդական կուսակցության (ԵԺԿ) անդամ Հանրապետական կուսակցության մամուլի խոսնակի կողմից նման տեսակետ արտահայտելն անընդունելի է և հակասում է մեր երկրի` ժողովրդավարական սկզբունքներով, մեխանիզմներով զարգանալու փիլիսոփայությանը:
«Հայաստանում իշխանությունները ձևավորվում են ժողովրդի կողմից` ազատ կամարտահայտման և ընտրությունների միջոցով: Հայաստանի Ազգային ժողովը, Հանրապետության նախագահը, համայնքի ղեկավարները և այլն ընտրվում են բացառապես ՀՀ քաղաքացիների կողմից:
Ես պարոն Շարմազանովի հայտարարությունները դասական քաղաքական իմաստով համարում եմ ոչ ճիշտ, անընդունելի, իսկ Հայաստանը` որպես ժողովրդավարական ուղի բռնած պետություն, այդ փիլիսոփայությանը հակասող:
Կարելի է կարծել, թե պարոն Շարմազանովը բացառում է քաղաքական մրցակցությունը, այլ ուժերի կողմից երկրի բարձրագույն պաշտոններում հավակնություններ ունենալու հնարավորությունը, ցանկությունը և այլն»,- ասաց Արթուր Միսակյանը:
Այդ դեպքում ինչպե՞ս էր ՕԵԿ-ը ժամանակին կոալիցիա կազմում այդպիսի ավտորիտար մտածողություն ունեցող կուսակցության հետ:
Պատասխանելով մեր այս հարցադրմանը` Արթուր Միսակյանն ասաց. «Ճիշտն ասած` այդ հայտարարությունը երեկ է եղել»:
