Ուկրաինայի Գերագույն ռադայում այսօրվա ծեծկռտուքից հետո որոշվել է այսուհետ բացառել նման դեպքերը (տեսանյութ)
Gazeta.ru-ի փոխանցմամբ՝ Ուկրաինայի Գերագույն ռադայում այսօր տեղի ունեցած ծեծկռտուքից հետո, որին մասնակցել է երկրի Կոմկուսի առաջնորդը, պատգամավորները պայմանավորվել են այլևս թույլ չտալ նման բան:
Այս մասին հայտարարել է Ուկրաինայի Գերագույն ռադայի նախագահ, երկրի նախագահի պաշտոնակատար Ալեքսանդր Տուրչինովը: Նա հավելել է, որ նման պայմանավորվածություն է ձեռք բերվել պատգամավորական խմբերի ու խմբակցությունների ղեկավարների միջև:
Այսուհետ, եթե պատգամավորներից մեկը սկսի նվաստացնել մեկ այլ պատգամավորի, վիրավորել նրան, կամ հնչեցնի գործող Սահմանադրությանն ու օրենսդրությանը հակասող կարգախոսներ, ապա նիստը նախագահողը պետք է անջատի այդ պատգամավորի բարձրախոսի ձայնը:
Տուրչինովի խոսքերով՝ խմբերի ու խմբակցությունների ղեկավարները դատապարտում են այսօրվա միջադեպը, որի կիզակետում հայտնվել են Կոմկուսի առաջնորդ Պյոտր Սիմոնենկոն և «Սվոբոդա» խմբակցության երկու պատգամավոր:
