Ո՞վ է «շների գծով» մասնագիտացած հանրապետական պատգամավորը
«Ասում են, թե քաղաքի բյուջեն հնարավորություն չի տալիս մի շարք խնդիրներ լուծել: Իսկ քաղաքի բյուջեն հնարավորություն տալի՞ս է 350 մլն դրամ ծախսել մի քանի շենքերի տոնածառի փուչիկների համար, 220 մլն դրամ ծախսել իբր շների ոչնչացման համար: Եվ այդ տենդերն ամեն տարի շահում է հանրապետական նույն պատգամավորը, որը, երևի, շների գծով իրենց միջի լավագույն մասնագետն է»,- նախօրեին Քանաքեռ-Զեյթուն վարչական շրջանի բնակիչների հետ հանդիպման ժամանակ հայտարարել էր ԱԺ ԲՀԿ խմբակցության քարտուղար Նաիրա Զոհրաբյանը:
168.am-ը երեկ Նաիրա Զոհրաբյանից հետաքրքրվեց, թե ո՞վ է «շների գծով» մասնագիտացած հանրապետական այդ պատգամավորը, որի մասին խոսել էր իր ելույթում: Ի պատասխան մեր հարցադրմանը, տիկին Զոհրաբյանն ասաց, թե այդ թեման իր հետաքրքրությունների տիրույթում չէ, բայց հավաստի տեղեկություններ ունի, որ շների ոչնչացման տենդերը պարբերաբար շահում է նույն անձնավորությունը: «Ոչ միայն այդ, այլև բոլոր տենդերները մշտապես շահում են գրեթե նույն մարդիկ, նույն կազմակերպությունները: Օրինակ, ասֆալտի տենդերը ևս նույն մարդիկ են շահում, նույն մեկ-երկու կազմակերպությունները: Եվ, առհասարակ, քաղաքապետարանի կողմից հայտարարված բոլոր տենդերներն էլ, եթե մոնիտորինգ հայտարարենք, կտեսնենք, որ շահում են նույն կազմակերպությունները: Եկեք չկենտրոնանանք հենց այդ անձնավորության վրա, որովհետև նրա անունն ինձ չի հետաքրքրում»:
ԲՀԿ-ական պատգամավորի խոսքով, թեպետ այդ անձինք ու կազմակերպություններն արդարանում են, թե տվյալ ոլորտում արդեն հմտացել են, պրոֆեսիոնալ են, բայց նաև նկատեց, որ այդ տենդերները պետք է բաց, թափանցիկ ու հետաքրքիր լինեն:
