ԱՆՑՈՒՄԱՅԻՆ ԼԻՑԵՆԶԻԱ. ՇԱՏ ՓՈՂ, ՈՉ ՄԻ ԿԱՊ ԲԺՇԿԻ ՄԱՍՆԱԳԻՏՈՒԹՅԱՆ ՀԵՏ ՈՒ ԲՈՂՈՔԻ ՄԵԾ ԱԼԻՔ. ԱՆՈՒՇ ՊՈՂՈՍՅԱՆ
Ըստ առողջապահության նախարարության՝ կլինիկական օրդինատորները (կլինիկական ռեզիդենտներ) և ռազմաբժշկական մասնագիտություններով հետավարտական լրացուցիչ ուսումնառություն իրականացնող անձինք մինչև 2026 թվականի հունվարի 1-ը պետք է ստանան անցումային անհատական լիցենզիա։ Ավագ բուժաշխատողները նույն պահանջը պետք է կատարեն մինչև 2027 թվականի հունվարի 1-ը։
Այս մասին 16TV-ի «Առողջ որոշում» հաղորդաշարի ժամանակ ասաց «Առողջության իրավունք» հասարակական կազմակերպության նախագահ Անուշ Պողոսյանը:
Այս անգամ նա անդրադարձել է անցումային անհատական լիցենզիաների խնդրին:
«Ներկայում առողջապահության ոլորտում մասնագիտական գործունեություն իրականացնելու թույլտվությունը համարվում է ՇՄԶ հավաստագիրը, սակայն օրենսդրական փոփոխություններից հետո այն փոխարինվելու է անհատական լիցենզիայով։ Այսինքն՝ բուժաշխատողի մասնագիտական գործունեության իրավունքը künftig կհաստատվի միայն լիցենզիայի առկայությամբ»,- ասաց Անուշ Պողոսյանը:
Նրա խոսքով՝ օրենքի համաձայն՝ առանց լիցենզիայի գործունեություն իրականացնելու դեպքում բուժաշխատողները կարող են տուգանվել 200-400 հազար դրամի չափով։
«Բացի այդ, նախատեսվում է սահմանել պետական տուրք՝ անհատական լիցենզիայի համար՝ բազային տուրքի տասնապատիկի, անցումային լիցենզիայի համար՝ բազային տուրքի եռապատիկի չափով։ Այս որոշումն արդեն բողոքի ալիք է բարձրացրել ուսանողների և երիտասարդ բժիշկների շրջանում։ Վերջիններս նշում են, որ լիցենզավորման քննությունը չի համապատասխանում իրենց մասնագիտացմանը, իսկ նախարարության կողմից կազմված հարցաշարերը «պարզունակ և ծիծաղելի» են։ Նրանք նաև նշում են՝ այս տեքստերը որևէ կապ չունեն բժշկական համալսարանի ծրագրերի հետ»,- ասաց Անուշ Պողոսյանը:
Բողոքների ֆոնին, ըստ փորձագետի, առողջապահության նախարար Անահիտ Ավանեսյանի հետ կայացել է փակ հանդիպում, որի ընթացքում նախարարը նշել է, որ հնարավոր է՝ վերանայվեն հարցաշարերը։ Սակայն, ինչպես նշում են մասնակիցները, մինչև այդ փոփոխությունները կյանքի կկոչվեն, մնացել է ընդամենը երկու ամիս, և այդ ժամանակահատվածում նոր համակարգին հարմարվելը գրեթե անհնար է։
Վերջինս նկատում է՝ նախարարի հայտարարությունը, թե՝ «ուզո՞ւմ եք որակյալ բժշկական օգնություն, թող սովորեն լեզուներն էլ, գրականությունն էլ…», շատերի մոտ ընկալվել է որպես վիրավորական և իրականությունից կտրված վերաբերմունք մասնագիտական կրթություն ստացող երիտասարդների նկատմամբ։
«Այս ամենի ֆոնին առողջապահության համակարգում ավելի ու ավելի է խորանում զգացողությունը, որ բարեփոխումներն արվում են ձևականորեն, առանց հաշվարկելու դրանց իրական ազդեցությունը ոլորտի վրա։ Արդյունքում՝ «անցումային լիցենզիա» կոչվող նորամուծությունը ոչ թե վստահություն է ներշնչում, այլ՝ շփոթություն և անորոշություն»,- եզրափակեց Անուշ Պողոսյանը:
Մանրամասները՝ տեսանյութում:
Բաժանորդագրվեք յութուբյան մեր ալիքին https://www.youtube.com/@168amofficial, գրեք ձեր հարցերը ձեզ հուզող խնդիրների մասին:
