«Կանայք են իրենց կողակիցներին գեղեցկացնում և ուժ տալիս»
«Շանթ» հեռուստաընկերության «Հայ սուպերսթար 2» նախագծի հաղթող Լուսինե Աղաբեկյանի անվան շուրջ անընդհատ ինչ-որ խոսակցություններ են ծավալվում: Կարճ ժամանակ անց նա մուտք գործեց հայկական շոու-բիզնես: Գտնվեց պրոդյուսեր, ով երգչուհուն օգնեց այդ ոլորտում առաջ գնալ: Չի կարելի ասել, թե նա հայկական շոու-բիզնեսի «գերազանցիկ» արտիստներից է, ով անընդմեջ որևէ նոր բան է ստեղծում, սակայն նրա մասին խոսակցությունները միշտ նորանոր ընթացք են ստանում: Խոսակցությունները ծավալվեցին երգչուհու և իր պրոդյուսեր Արամայիս Հայրապետյանի հավանական ամուսնության շուրջ, որը զույգը մեկ հերքում, մեկ հաստատում էր: Օրերս շատերին զարմացրեց այն տեղեկատվությունը, ըստ որի՝ երգչուհին և իր պրոդյուսերը իրենց նոր՝ «Հիմա» տեսահոլովակի վրա ծախսել են 50.000 ԱՄՆ դոլար: Նշենք, որ տեսահոլովակի նկարահանման աշխատանքները սկսվել էին դեռևս նախորդ տարի, սակայն ինչ-ինչ պատճառներով դադարեցվել էին: Այժմ պատրաստվում են վերսկսել աշխատանքներն ու վերջապես հանրությանը ներկայացնել այդքան ձգձգված աշխատանքը:
– Ինչո՞ւ հաճախ չեք լինում եթերում:
– Պատրաստում եմ նոր գործեր ներկայացնել հանդիսատեսին: Կարող եմ շատ հաճախ եթերում լինել, բայց դա կազդի մատուցված աշխատանքի որակի վրա: Ուզում եմ միշտ եթերում հայտնվել որակյալ աշխատանքով, դա է պատճառը, որ եթերում հաճախ չեմ հայտնվում: Արդեն ունեմ 7 նոր երգեր, որոնց վրա հիմա աշխատում եմ: Կա նաև տեսահոլովակ; Պատրաստվում եմ շուտով հանդիսատեսի դատին ներկայացնել իմ «Հիմա» երգի տեսահոլովակը:
– Համագործակցություններ շոու-բիզնեսի ներկայացուցիչների հետ սպասվո՞ւմ են:
– Այո, կան, բայց դրա մասին դեռ բարձրաձայնել չեմ ցանկանում:
– Ցանկանո՞ւմ եք հայկական շոու-բիզնեսում Ձեր հաստատուն տեղն ունենալ, շատերն են ձգտում հաստատվել այդ ասպարեզում:
– Դե աշխատում ենք, որ ամեն բան լավ լինի:
– Պատասխանների մեջ բավական հստակ, կարճ ու, թերևս, նաև կոշտ եք:
– Չէի ասի, որ կոշտ եմ, բայց ինչ վերաբերում է հստակությանը՝ այո, հստակ եմ, որովհետև չեմ ցանկանում ավելին ասել, որը դեռ չի արվել կամ դեռ ընթացքի մեջ է:
– Հիմա ի՞նչ կարգավիճակում եք, ասում էին՝ ամուսնացել եք:
– Ամուսնացած եմ:
– Աղջիկների մեծամասնությունը, մինչ իրենց ընտրյալին հանդիպելը, ապագա ընտրյալին որոշակի չափանիշներով են օժտում իրենց պատկերացումներում, որոնք շատ դեպքերում այնքան էլ իրականությանը չեն համապատասխանում: Դուք ունեի՞ք նման չափանիշներ:
– Ինձ թվում է՝ յուրաքանչյուր մարդ իր մտքում ունի այդպիսի մի «x» մարդ, բայց դրանով ապրել կամ դա փնտրել պետք չէ: Դա ուղղակի իդեալ է, որ ամեն մեկս մեր մտքում ունենք:
– Խոհանոցում ինչպիսի՞ն եք: Սիրո՞ւմ եք պատրաստել:
– Պատրաստել սիրում եմ ու ամեն օր մեծ հաճույքով պատրաստում եմ:
– Լուսինե, կանանց տոները շարունակվում են, և շոու-բիզնեսի շատ ներկայացուցիչներ իրենց շնորհավորանքներն արդեն ուղղել են գեղեցիկ սեռին, Դո՞ւք ինչ կասեք:
– Թող որ բոլոր գեղեցիկ սեռի ներկայացուցիչները լինեն ժպտերես, խելացի, քանզի մենք ենք մեր կողակիցներին գեղեցկացնում և ուժ տալիս: Սիրում եմ բոլորիդ և, առիթից օգտվելով, շնորհավորում եմ Մայրության և գեղեցկության տոնի առթիվ:
