ՌԴ Պետդուման հայտարարություն է պատրաստում «Ուկրաինայում քաղաքական բռնությունների մասին»
Ռուսական ИТАР-ТАСС լրատվական գործակալության փոխանցմամբ՝ ՌԴ Պետդուման պլանավորել է դիտարկել «Ուկրաինայում քաղաքական բռնությունների մասին» հայատարարություն:
Դրա նախագիծը երեկ երեկոյան Ստորին պալատ են մտցրել խորհրդարանական բոլոր չորս խմբակցությունների առաջնորդներն ու Պետդումայի նախագահ Սերգեյ Նարիշկինը:
Պատգամավորներն ընդգծում են, որ Պետդուման չափազանց մտահոգ է Ուկրաինայում քաղաքացիների իրավունքների ու ազատությունների զանգվածային խախտումների կապակցությամբ.
«Ինքնահռչակ իշխանությունը, հենվելով ծայրահեղական ուժերի վրա և ներգրավելով իրավապահներին, ոչ իրավական մեթոդներ է կիրառում իր քաղաքական ընդդիմադիրների նկատմամբ՝ դիմելով քաղաքական ու ֆիզիկական բռնությունների և քաղաքական դրդապատճառներով հալածանքների:
Քաղաքական բռնությունները բացառում են Ուկրաինայի քաղաքական ճգնաժամը քաղաքակիրթ լուծելու հնարավորությունը: Պետդուման դատապարտում է ինքնահռչակ իշխանության հակաիրավական գործողությունները և կտրականապես դեմ է քաղաքական կյանքի հարցերն ուժային մեթոդներով լուծելուն:
Ուկրաինան բազմազգ երկիր է, և նրա բոլոր քաղաքացիները պետք է ունենան հավասար իրավունքներ ու հնարավորություններ, որոնք պետք է պաշտպանված լինեն օրենքով»:
