Իրանը հայտարարել է Ֆարս նահանգում խոշոր գազի հանքավայրի հայտնաբերման մասին
Իրանը Ֆարս նահանգում հայտնաբերել է բնական գազի խոշոր հանքավայր, որի պաշարները գերազանցում են 7,5 տրիլիոն խորանարդ ֆուտը (մոտ 212 մլրդ խորանարդ մետր)։
Fars գործակալության գնահատմամբ, հայտնաբերված ռեսուրսների արժեքը կարող է կազմել տասնյակ միլիարդավոր դոլարներ։
Իրանի նավթի նախարար Մոհսեն Փաքնեժադը հայտնել է, որ գազի մոտ 5,7 տրիլիոն խորանարդ ֆուտը (161 մլրդ խորանարդ մետր) հնարավոր կլինի արդյունահանել։ Այդ ծավալը համադրելի է երկրի խոշորագույն գազային հանքավայրի՝ Հարավային Փարսի, փուլերից մեկում մոտ 15 տարվա արդյունահանման հետ։
Բացի այդ, հանքավայրը պարունակում է գազային կոնդենսատի զգալի պաշարներ։ Նախարարի կարծիքով, համախառն ռեսուրսները կարող են երկրի համար եկամուտների նոր աղբյուր դառնալ։
Փաքնեժադը հանքավայրի հայտնաբերումն անվանել է Իրանի էներգետիկ հատվածի համար կարևոր իրադարձություն՝ նշելով դրա հնարավոր նշանակությունը արդյունահանման ավելացման և երկրի ռեսուրսային բազայի ամրապնդման համար։
