«Կանադան կպարտվի». Թրամփի վարչակազմը Օտտավային սպառնացել է առևտրային պատերազմի հետևանքներով
ԱՄՆ նախագահ Դոնալդ Թրամփի վարչակազմը Կանադային նախազգուշացրել է առևտրային պատերազմի «կործանարար» հետևանքների մասին՝ երկու երկրների միջև բանակցությունների տապալումից հետո։
Վաշինգտոնի և Օտտավայի բանակցություններն ուրբաթ ավարտվել են առանց համաձայնագրի։ Դրանից հետո ուժի մեջ են մտել կանադական շուրջ 20 միլիարդ դոլար արժողությամբ ապրանքների նկատմամբ ամերիկյան նոր 50-տոկոսանոց մաքսատուրքերը։ AFP-ի հաղորդմամբ, դրանք անդրադարձել են Կանադայի ԱՄՆ արտահանման մոտ 5,5%-ի վրա։
Կանադան հայտարարել է հայելային միջոցների մասին։ Սեպտեմբերի 8-ից երկիրը կսահմանի նոր մաքսատուրքեր, մասնավորապես ամերիկյան պողպատի և կաթնամթերքի վրա։
ԱՄՆ տրանսպորտի նախարար Շոն Դաֆին հայտարարել է, որ Դոնալդ Թրամփի հետ առևտրային դիմակայության մեջ Կանադան տանուլ կտա։ Ըստ նրա, կանադական արտահանման մոտ 70%-ը բաժին է ընկնում ամերիկյան շուկային։
«Կարծում եմ՝ նրանց կողմից հիմարություն կլիներ կարծել, թե կարող են Դոնալդ Թրամփի դեմ առևտրային պատերազմ սկսել և հաղթել»,- Fox News հեռուստաալիքի եթերում ասել է Դաֆին։
Նա վստահություն է հայտնել, որ Կանադայի վարչապետ Մարկ Քարնին շուտով կվերադառնա բանակցությունների սեղանի շուրջ, քանի որ հակամարտության հետևանքները երկրի համար «կործանարար» կլինեն։
Սակայն Քարնին կոշտ դիրքորոշում է որդեգրել և հայտարարել, որ Կանադան ենթարկվել է հարձակման և պատասխանելու է։ Քարնին նշել է, որ վերջին բանակցությունների ընթացքում Վաշինգտոնը առաջ է քաշել պահանջներ, որոնք կսահմանափակեին Կանադայի՝ այլ երկրների հետ առևտրային համաձայնագրեր կնքելու հնարավորությունը, ինչպես նաև կանդրադառնային Քվեբեկի ֆրանսերեն լեզվին ու մշակույթին։
Ի պատասխան՝ Թրամփը հայտարարել է, որ Կանադան ցանկանում է օգտվել ամերիկյան նահանգի առավելություններից՝ չդառնալով այդպիսին, կրկին շոշափելով երկիրը ԱՄՆ 51-րդ նահանգի վերածելու թեման։
Առևտրային հակամարտությունն ուժեղացնում է լարվածությունը երկու ավանդական դաշնակիցների հարաբերություններում։ 2025 թվականի հունվարին Թրամփի՝ Սպիտակ տուն վերադառնալուց հետո նա բազմիցս սպառնացել է միացնել Կանադան ԱՄՆ-ին։
Իր հերթին, Քարնին հայտարարել է, որ երկու երկրների հարաբերություններն արդեն ընդմիշտ փոխվել են, և Կանադային անհրաժեշտ է նվազեցնել կախվածությունն ամերիկյան շուկայից։
Վերջին բանակցությունների ընթացքում Օտտավան ձգտում էր մեղմացնել ավտոմեքենաների, պողպատի և ալյումինի նկատմամբ ամերիկյան մաքսատուրքերը։ ԱՄՆ-ի առևտրային բանակցություններում ներկայացուցիչ Ջեյմիսոն Գրիրը հայտարարել է, որ Վաշինգտոնն առաջարկել էր նվազեցնել այդ սակագները և չեղարկել կանադական փայտանյութի նկատմամբ վերջերս սահմանված մաքսատուրքը։ Ըստ նրա, նման պայմանները Կանադային կապահովեին ԱՄՆ գործընկերների շրջանում առավել արտոնյալ առևտրային ռեժիմ։
Կողմերի միջև նոր բանակցություններ առայժմ նախատեսված չեն։
