ԵՄ-ի հետ վիզային ռեժիմի վերացման համար անհրաժեշտ է կասեցնել ԱՊՀ-ից ՌԴ ապօրինի ներգաղթյալների ներհոսքը. Ռոգոզին
![](https://168.am/wp-content/uploads/2013/04/932577181.jpg)
Ռուսական РИА Новости լրատվական գործակալության փոխանցմամբ՝ Ռուսաստանի փոխվարչապետ Դմիտրի Ռոգոզինը կարծում է, որ Ռուսաստանին չի հաջողվի պայմանավորվածության գալ Եվրոպայի հետ գործող վիզային ռեժիմի վերացման շուրջ՝ առանց սեփական սահմանագծերի վերահսկման խստացման:
Ռոգոզինն այցելել է Աստրախանի մարզում գտնվող սահմանային կայան, ուր տվյալ պահին ժամանել է «Դուշանբե-Մոսկվա» գնացքը: Ռոգոզինն անձամբ է զննել այդ գնացքում գտնվողներին: Լրագրողների հետ զրույցում Ռոգոզինը հայտարարել է. «Մենք ցանկանում ենք հասնել ԵՄ-ի հետ հարաբերություններում որոշակի ազատականացման, դուրս գալ Եվրոպայի հետ ոչ վիզային տիրույթ:
Սակայն մեզ ոչ ոք չի թողնի Եվրոպա, եթե մենք մեզ թույլ ենք տալիս սեփական սահմաններին ունենալ նմանատիպ ռեժիմ: Դա նաև վերաբերում է սանիտարական պահանջների չիրագործմանը: Մարդիկ մեր երկիր են ժամանում այնպիսի գնացքներով, որոնք նախատեսված չեն մարդկանց տեղափոխման համար: Սանիտարական վիճակը սարսափելի է:
Պետք է ինչ-որ բան ձեռնարկել՝ դրա հետ կապված: Պետք է գտնել այնպիսի որոշում, որը մեզ հնարավորություն կընձեռի վերահսկել պետական սահմանն ու կանխարգելի ապօրինի ներգաղթյալների ներհոսքը: Արդեն այս տարի Ռուսաստանում կարող է մտցվել հատուկ կարգ, որով ԱՊՀ անդամ երկրների քաղաքացիներին թույլ կտրվի մեր երկիր մուտք գործել միայն արտասահմանյան անձնագրերով:
Կարծում եմ, որ անհրաժեշտ է մնոտ ժամանակներս կասեցնել այն փաստաթղթերով Ռուսաստան ներհոսքը, որոնք ենթակա չեն նույնականացման: Նախագահ Վլադիմիր Պուտինը Դաշնային ժողովին հղած իր ուղերձում անհրաժեշտ է համարել այդպիսի միջոցներ ձեռնարկել 2015 թվականից ոչ ուշ:
Կառավարությունը պատասխանատու է տվյալ որոշման ի կատար ածման համար: Լիովին հնարավոր է, որ այդ միջոցներն ընդունվեն շատ ավելի արագ: Համենայն դեպս, դրանք առաջին հերթին կառնչվեն Տաջիկստանից երկաթուղային հաղորդակցությանը»:
Հիշեցնենք, որ 2012 թվականին Ռուսաստանից ԱՊՀ երկրներ անձնական փոխանցումների ծավալը կազմել է 20.11 միլիարդ դոլար, մինչդեռ 2011 թվականին այդ ցուցանիշը կազմել է 16.53 միլիարդ դոլար: Հայաստանի մասնաբաժինը կազմել էր 1398 միլիոն դոլար, իսկ Տաջիկստանի ցուցանիշը երրորդն է՝ 3125 միլիոն դոլար: