Հ1-ին կառաջարկեի միշտ գալ ու լուսաբանել այս գործը, որ մարդիկ տեսնեն՝ ինչ փուչիկ է. Ամրամ Մակինյան
Մինչ 4 օր շարունակ ադրբեջանցի «էկո»-տեռորիստների կողմից փակված է մնում Արցախը Հայաստանին կապող միակ ճանապարհը՝ հումանիտար ճգնաժամ ստեղծելով 120 000 –ից ավելի արցախցիների համար, Երևան քաղաքի ընդհանուր իրավասության դատարանի Ավան և Նոր Նորք նստավայրում առանց որևէ շեղման շարունակվեց դիզվառելիքի գործով հերթական նիստը: Նկատենք՝ այս անգամ նիստը լուսաբանում էր նաև Հանրային Հեռուստաընկերությունը:
Դատական նիստից հետո ՀՀ Երրորդ նախագահ Սերժ Սարգսյանի պաշտպան Ամրամ Մակինյանը 168.am-ի հետ զրույցում անդրադառնալով գործով առանցքային վկայի ցուցմունքների հակասություններին՝ նշեց. «Դուք կտեսնեք հաջորդ դատական նիստին, թե ցուցմունքներն ինչքանով են հակասական, անարժանահավատ:
Մենք նախորդ դատական նիստին առիթ ունեցանք ցույց տալու տուժողի իրական բիզնես նկարագիրը, որ տասը միլիոն դոլարի պարտքեր ունենալով՝ փորձ էր արել մասնակցել այդ պրոյեկտին: Եվ այդ դիմումի ներկայացման պայմաններում այդ 10 միլիոն դոլարը «ջրվել էր»:
Ես նկատեցի նաև, որ պարոն Նախագահի գործով դատական նիստը նաև Հանրային հեռուստաընկերութունն է լուսաբանել. կառաջարկեի, որ միշտ գան և լուսաբանեն այս գործը և հանրությանը ցույց տան, թե ինչ փուչիկ գործի հետ գործ ունենք»:
