«Այդ 2 ադրբեջանցիները համարվում են ՌԴ քաղաքացի, ԱԱԾ-ն ամեն ինչից էլ տեղյակ է». Ջեմմա Հարությունյան
Երեկվանից համացանցում տեսանյութեր են պտտվում, որ երկու ադրբեջանցիներ Հայաստանի տարբեր վայրերից տեսանյութեր են տարածում, որտեղ պատմում են, թե իբր ժամանակին այդ տարածքներում ադրբեջանցիներ են ապրել։ Տեսանյութերից մեկն էլ արվել է Շիրակի մարզում՝ Գյումրիում, այնուհետև՝ Ամասիայում, որտեղ ադրբեջանցին մոտենում է պարեկներին, այնուհետև նկարում տարբեր շինություններ։
168.am-ն Ամասիայի համայնքապետ Ջեմմա Հարությունյանից հետաքրքրվեց՝ տեղյա՞կ է 2 ադրբեջանցիների մասին, նրանք ի՞նչ էին անում Ամասիայում։
«Ինձ հետևյալն է հայտնի՝ այդ 2 ադրբեջանցիները համարվում են ՌԴ քաղաքացի, նրանց մեքենաները ռուսական համարներով են։ Այդ պատճառով էլ ոստիկանները ՌԴ քաղաքացու նկատմամբ որևէ միջոց ձեռնարկելու իրավասություն չունեն։ Այսքան բան է ինձ հայտնի։
Ինքս այդ մարդկանց չեմ տեսել, համացանցում տարածված տեսանյութով եմ տեսել»,- նշեց Ամասիայի համայնքապետը։
Ըստ նրա, 2 ադրբեջանցիները բնակիչների հետ խոսակցություն չեն ունեցել, միայն տարածքը նայել, նկարել ու հեռացել են։
«Այդ մարդիկ Գյումրիում էլ են եղել, ռեստորան են գնացել, հետո եկել են Ամասիա։ Մեր ԱԱԾ-ն ամեն ինչից էլ տեղյակ է, ամեն ինչ հսկողության տակ է, իրենք ավելի տեղյակ են, քան մենք»,- նշեց Ջեմմա Հարությունյանը։
