Քաղցր տաքդեղներով ու ձիթապտուղներով ճագար
Բաղադրիչները՝
- Ճագարի 4 բդիկ
- 50 գ բեկոն
- 1/2 բաժակ սպիտակ չոր գինի
- 2 միջին չափի գլուխ սոխ
- 1 ճյուղ նեխուր
- 1 միջին չափի լոլիկ
- 1 քաղցր կարմիր տաքդեղ
- 1 քաղցր դեղին տաքդեղ
- 50 գ ձիթապտուղ՝ առանց կորիզի
- փոքր փունջ ռեհան ու հազրեվարդ
- ձիթապտղի ձեթ
- աղ
Պատրաստման եղանակը
Հաստ հատակով կաթսայի մեջ 2-3 ճ/գ ձեթ լցրեք ու տեղադրեք ճագարի բդիկները: Մանր կտորներով կտրտեք բեկոնը, ավելացրեք ճագարին: Սոխը կտրատեք բարակ օղակների ձևով ու ավելացրեք ճագարին:
Կաթսան տեղադրեք միջին ուժգնության կրակի վրա ու ճագարը բոլոր կողմերից տապակեք, մինչև ոսկեգույն երանգ ստանալը: Մոտ 10 րոպե: Ապա ճագարի վրա լցրեք գինին, թողեք գոլորշիանա:
Ռեհանի ու հազրեվարդի ցողունները հեռացրեք, թողեք միայն տերևները: Նեխուրն ու լոլիկները փոքր կտորներով, քաղցր տաքդեղները շերտերով կտրատեք, ամենը ավելացրեք ճագարին: Ճագարով կաթսայի մեջ ավելացրեք նաև խոտաբույսերն ու ձիթապտուղները: Աղ արեք, կափարիչով ծածկեք և միջին կրակի վրա 15 րոպե պատրաստեք:
Ճագարի բդիկները հանեք կաթսայից, ոսկորները հեռացրեք: Սոուսը, որի մեջ ճագարը շոգեխաշել եք, պյուրեի վերածեք: Տաքացրած ափսեի մեջ տեղադրեք ճագարը, վրան լցրեք ստացված սոուսը ու միանգամից մատուցեք:
Խորհուրդ: Նեապոլիտանացիներն այս ուտեստի մեջ ավանդաբար բեկոն չեն ավելացրել՝ նախընտրելով այն փոխարինել խոտաբույսերով: Եթե ուզում եք ուտեստն ավանդական ձևով փորձել, ուտեստի մեջ մի պտղունց խնկածաղիկ և ուրց ավելացրեք: Ցանկության դեպքում ճագարը կարող եք մատուցել «բնական» վիճակում՝ բաց թողնելով պատրաստման եղանակի 4-րդ քայլը. այսինքն, պետք չէ հեռացնել ոսկորներն ու սոուսը պյուրեի վերածել: Այդ եղանակով նույնպես ուտեստը համեղ է ստացվում:
