ՄԱԿ-ի գլխավոր քարտուղարը ՌԴ-ին և ԱՄՆ-ին կոչ է արել կրճատել միջուկային զինանոցները
Միավորված ազգերի կազմակերպության գլխավոր քարտուղար Անտոնիո Գուտերեշը հայտարարել է, որ Ռուսաստանի Դաշնությունը և Միացյալ Նահանգները պետք է վերադառնան միջուկային զինանոցների կրճատման գործընթացին, իսկ մյուս երկրները, որոնք նույնպես ունեն միջուկային զենք, պետք է հետևեն այդ օրինակին։
Այս մասին հայտնում է ՌԻԱ Նովոստի-ն՝ մեջբերելով Անտոնիո Գուտերեշի խոսքերը ՄԱԿ-ի Գլխավոր ասամբլեայի շրջանակներում Միջուկային զենքի ամբողջական վերացման միջազգային օրը նշելու և խթանելու բարձր մակարդակի լիագումար հանդիպումից:
Գլխավոր քարտուղարի խոսքով՝ չնայած մարդկության համար միջուկային զենքի «ահռելի գոյութենական ռիսկերին», աշխարհն ավելի մոտ չէ դրանց վերացմանը, քան տասը տարի առաջ:
«Մենք բոլորովին սխալ ուղղությամբ ենք շարժվում», – ասել է նա՝ հավելելով, որ սպառազինությունների նոր մրցավազքի հնարավորության վերաբերյալ մտահոգություններ կան։
ՄԱԿ-ի գլխավոր քարտուղարը կոչ է արել «Ռուսաստանի Դաշնությանը և Միացյալ Նահանգներին վերադառնալ միջուկային զինանոցների կրճատման գործընթացին, իսկ միջուկային զենք ունեցող մյուս պետությունները պետք է հետևեն այդ օրինակին», – ընդգծել է Գլխավոր քարտուղարը՝ միաժամանակ շեշտելով, որ զինաթափումը և զենքի չտարածումը նույն մետաղադրամի երկու երեսն են։
