Ադրբեջանական զինված ուժերը փորձում են տեղադրել Ադրբեջանի դրոշը ՀՀ ինքնիշխան տարածքում․ Մարուքյանը դիմել է երկրների և կազմակերպությունների ներկայացուցիչներին
Հատուկ հանձնարարություններով դեսպան Էդմոն Մարուքյանն իր թվիթերյան էջում հրապարակել է Ադրբեջանի զինված ուժերի իրականացրած սադրանքի տեսանյութը։
Նա հրապարակման մեջ հեշթեգով նշել է ԱՄՆ պետքարտուղար Էնթոնի Բլինքենին, ԵՄ անվտանգության և արտաքին քաղաքականնության հարցերով բարձր ներկայացուցիչ Ջոզեպ Բորելին, Եվրոպայի խորհրդի նախագահ Շառլ Միշելին, Ֆրանսիայի նախագահ Էմանուել Մակրոնին և Գերմանիայի կանցլեր Օլաֆ Շոլցին։
«Սա ադրբեջանական զինուժի նոր սադրանք է։ Տեսանյութում երևում է, թե ինչպես են ադրբեջանական զինված ուժերը ռուս խաղաղապահների ներկայությամբ փորձում տեղադրել Ադրբեջանի դրոշը Հայաստանի Հանրապետության՝ միջազգայնորեն ճանաչված ինքնիշխան տարածքում։ Հայաստանի սահմանապահների գործողություններից հետո փորձը ձախողվեց։ Լարվածությունն օրեցօր աճում է մշտական հարձակումներով, ու սա ևս մեկ փորձ է խաթարելու շարունակվող խաղաղ գործընթացն ու զրոյացնելու միջազգային հանրության բոլոր ջանքերը»,- գրել է նա։
This is a fresh provocation by the Azerbaijani armed forces. The video shows how Azerbaijani armed forces, in the presence of Russian peacekeepers, try to install the flag of Azerbaijan on the internationally recognized sovereign territory of the Republic of Armenia. After… pic.twitter.com/P2zpLFszfP
— Edmon Marukyan (@edmarukyan) June 15, 2023
