«Ձեր իշխանությունն է հանձնել Քաշաթաղը, Լաչինի ճանապարհը․ հիմա լոլոներ եք կարդում, թե՝ գնացեք ռուսներից պահանջե՞ք»․ Արծվիկ Մինասյան
«Հերթական անգամ իշխանությունը փորձում է մանիպուլյացիա անել, իր պարտականությունն անընդհատ բարդել Ռուսաստանի Դաշնության վրա»,- այսօր Ազգային ժողովի արտահերթ նիստում հայտարարեց «Հայաստան» խմբակցության քարտուղար Արծվիկ Մինասյանը՝ անդրադառնալով Լաչինի միջանցքը ադրբեջանցիների կողմից փակելուն, ապա ԱԽՔ Արմեն Գրիգորյանի պարզաբանմանը, թե նոյեմբերի 9-ին հայտարարությամբ Ռուսաստանի Դաշնությունն է նշված հատվածի պատասխանատուն։
«Ուզում եմ հիշեցնել, որ նոյեմբերի 9-ի եռակողմ հայտարարությունը, որ սկզբում ամոթով, բայց հետո հպարտությամբ էիք հիշատակում․․․ Ձեր իշխանությունն է հանձնել Քաշաթաղը, ձեր իշխանությունն է հանձնել Լաչինի այլընտրանքային ճանապարհը, ձեր իշխանությունն է ստանձնել պարտավորություն՝ լինել Արցախի երաշխավորը, հիմա եկել եք այստեղ լոլոներ եք կարդում, թե՝ գնացեք ռուսներից պահանջե՞ք, ռուսներից էլ պետք է պահանջենք, բայց առաջին պատասխանատուն դո՛ւք եք, Հայաստանի իշխանությունն է, որ երկիրը հասցրել է այս օրին։
Հիմա արտաքին հետախուզական ծառայություն եք ստեղծում, ՊՊԾ-ն եք հանում տանում, սուլթանական իշխանական համակարգ եք սարքում մեկ անձի շուրջ, դա ոչ մի ձևով չի կարող փարատել այն մտահոգությունը, որ այսօր Արցախը շրջափակման մեջ է․․․»։
Հիշեցնենք, որ դեկտեմբերի 12-ին, ժամը 10։30-ի սահմաններում ադրբեջանական կողմը խախտելով 2020 թվականի նոյեմբերի 9-ի եռակողմ հայտարարության դրույթները, բնապահպանական պատճառաբանություններով փակել է Արցախն աշխարհին կապող կյանքի միակ ճանապարհը՝ ոտնահարելով քաղաքացիական բնակչության կենսական շահերն ու իրավունքները: Այս պահին Ստեփանակերտի Հանրապետական հիվանդանոցում կան հիվանդներ, որոնց պետք է տեղափոխեն Երևան՝ վիրահատելու համար, սակայն ճանապարհի փակ լինելու հետևանքով նրանց տեղափոխումն անհնարին է դառնում։ Միայն Կարմիր խաչի միջնորդությամբ կարողացել են մեկ հոգու տեղափոխել Երևան՝ վիրահատելու նպատակով։ Հիվանդներից մեկը երեկ մահացել է։
