«Ով հաղթի արհեստական բանականության ոլորտում, նա՛ էլ կհաղթի»․ Դոնալդ Թրամփ
«Այն նույն մարդիկ, որոնք ասում էին՝ «Տասներկու տարի հետո մենք բոլորս կմեռնենք գլոբալ տաքացման պատճառով» (մի անվանում, որը հետագայում «վերածնվեց» և դարձավ «կլիմայի փոփոխություն», քանի որ մոլորակը սառչում էր, այլ ոչ թե տաքանում, և ոչ ոք չմահացավ), այժմ ասում են, որ արհեստական բանականությունը մեզ կոչնչացնի, որ ռոբոտները կհարձակվեն մեզ վրա, և որ այս ամենն աղետ է։
Սա էլ ավելի մեծ մոլորություն է, քան նույնիսկ «ՌՈՒՍԱՍՏԱՆ, ՌՈՒՍԱՍՏԱՆ, ՌՈՒՍԱՍՏԱՆ»-ը, «ՈՒԿՐԱԻՆԱ, ՈՒԿՐԱԻՆԱ, ՈՒԿՐԱԻՆԱ»-ն և կլիմայի փոփոխությունը։
Ով հաղթի արհեստական բանականության ոլորտում, նա՛ էլ կհաղթի։ Այժմ մենք առաջ ենք անցնում Չինաստանից և մյուս բոլորից, և ես պատրաստվում եմ պահպանել այդ առավելությունը։
Ես չեմ պատրաստվում զսպել մի բանի զարգացումը, որը կարող է ավելի մեծ լինել, քան արդյունաբերական հեղափոխությունը կամ նույնիսկ ինքը՝ համացանցը։
Մենք կգործենք զգուշորեն, և հենց այդ պատճառով ունենք Արդարադատության նախարարություն և այլ իրավապահ մարմիններ, որոնք անհրաժեշտության դեպքում կկարողանան միջամտել և իրենց վերահսկողության տակ վերցնել իրավիճակը։ Բայց ես միայն խրախուսելու եմ արհեստական բանականության՝ սուպերինտելեկտի զարգացումը»,-գրել է Թրամփը՝ ի պատասխան բոլոր այն ընկերությունների, որոնք ահազանգում են արհեստական բանականության պատճառով առաջացող ռիսկերի մասին, մարդկությանը դրանց հասցրած աղետների մասին՝ առաջարկելով դրանք կանոնակարգել։
