«Սյունիքում ապահով է, սյունեցին Սյունիքում է, անհանգստանալու որևէ առիթ, համենայն դեպս՝ այս պահին, չկա». Սյունիքի մարզպետարանի գլխավոր քարտուղար
![](https://168.am/wp-content/uploads/2020/10/Syuniq.jpg)
Երկու օր առաջ ՊՆ ներկայացուցիչ Արծրուն Հովհաննիսյանը ճեպազրույցի ժամանակ հայտնեց, թե թշնամին մոտեցել է Սյունիքի դարպասներին։ Ի՞նչ վիճակ է այսօր Սյունիքում: 168.am-ի հետ զրույցում Սյունիքի մարզպետարանի գլխավոր քարտուղար Էդգար Մարտիրոսյանը հայտնեց, որ մարզում խուճապ չկա:
«Հանդարտ, աշխատանքային, նորմալ իրավիճակ է, խուճապ չկա»,- ասաց Էդգար Մարտիրոսյանը:
Հստակեցնող հարցին, թե կարո՞ղ ենք վստահեցնել, որ Սյունիքում նույն աշխատանքային, սովորական առօրյան է, Էդգար Մարտիրոսյանը պատասխանեց.
«Բնականաբար, նույնը չի, քանի որ Հայաստանում ռազմական դրություն է հայտարարված, և Արցախում պատերազմ է ընթանում, բայց մարդիկ համախմբված են, կենտրոնացված են, և ամենօրյա սովորական աշխատանքն է ընթանում: Եվ այն գործողությունները, որոնք պիտի օժանդակեն, որ թիկունքը ամուր լինի և առաջնագիծը ամուր լինի, բնականոն հունով ընթանում են»:
Սյունիքի մարզպետարանի ներկայացուցչից նաև հետաքրքրվեցինք՝ արդյոք մարզում լսելի՞ են կրակոցների ձայներ:
«Կապանում, որտեղ ես եմ գտնվում, լսելի չեն: Չեմ բացառում, որ Արցախի Հանրապետության սահմանակից բնակավայրերում կամ տարածքներում հրետանային համազարկի ձայները կարող են լսելի լինել»,- ասաց Էդգար Մարտիրոսյանը:
Սյունիքի մարզպետարանի գլխավոր քարտուղար Էդգար Մարտիրոսյանը վստահեցրեց՝ Սյունիքում անվտանգ է:
«Սյունիքում ապահով է, սյունեցին Սյունիքում է, որևէ խնդիր չեմ տեսնում այդ առումով, անհանգստանալու որևէ առիթ, համենայն դեպս՝ այս պահին, իմ կարծիքով, չկա»,- զրույցը եզրափակեց Էդգար Մարտիրոսյանը: