«Դատախազությունը մասնակցում է այդ ապօրինի գործողությանը». Դավիթ Սանասարյան

«Արդեն ասել ենք, որ Դատախազությունը մասնակցում է այդ ապօրինի գործողությանը:  Նոր ենք ստացել մերժումը, բայց ակնհայտ էր այս ամեն ինչը»,- 168.am-ի հետ զրույցում նշեց ՊՎԾ լիազորությունները կասեցված պետ Դավիթ Սանասարյանը՝  անդրադառնալով Դատախազության կողմից իր և ՊՎԾ նախկին պաշտոնյաների վերաբերյալ գործից մաս անջատելու որոշման առնչությամբ պաշտպանի բողոքի մերժմանը:

Դ. Սանասարյանը նաև նշեց, որ իրենց կողմից ներկայացված որևիցե ապացույց, փաստարկ Դատախազությունը երբեք հիմնավոր չի համարել . «Դա կամայական մոտեցում է»:

Ի դեպ, ՊՎԾ լիազորությունները կասեցված պետի բուն գործով նախաքննությունը ավարտվել է, և գործը դատարանում է։ Մեզ հետ զրույցում Դ. Սանասարյանը հայտնեց, որ մոտ օրերս կտեղեկացնի, թե երբ է դատական նիստի օրը:

168.am-ն արդեն տեղեկացրել էր, որ ՀՀ գլխավոր դատախազությունը մերժել է պաշտոնեական լիազորությունները չարաշահելու մեջ մեղադրվող Դավիթ Սանասարյանի պաշտպանի բողոքը, որն առնչվում էր Սանասարյանի և ՊՎԾ նախկին պաշտոնյաների վերաբերյալ գործից մաս անջատելու որոշմանը։ Ինչպես տեղեկացրել էին Դատախազությունից՝ պաշտպանի բողոքը մերժվել է անհիմն լինելու պատճառաբանությամբ։

Դ. Սանասարյանի պաշտպան Արսեն Սարդարյանը 168.am–ի հետ զրույցում նշել էր, որ պատրաստվում են առանձին բողոքարկել այդ որոշումը. «Մենք կարծում ենք, որ քննություն իրականացնող մարմինը գործը դատարան ուղարկելիս առանց որևէ հիմքի չի կարող այն առանձնացնել, արհեստականորեն երկու գործ սարքել և մեկ գործը պահել իր մոտ, որպեսզի հետագայում հնարավորություն ունենա այդ ենթադրյալ արարքների վերաբերյալ կրկնակի քննություն իրականացնել»:

Հիշեցնենք, որ հոկտեմբերի 2-ին հրավիրված մամուլի ասուլիսի ընթացքում Դավիթ Սանասարյանը հայտարարել էր, որ հարուցված քրեական գործից նույնիսկ առանձին մաս է անջատվել, որից իրենք տեղյակ չեն։ Սանասարյանի պնդմամբ՝ իր նկատմամբ կրկնակի հետապնդում է իրականացվում։

Դավիթ Սանասարյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով. այն է՝ պաշտոնեական լիազորությունները չարաշահելը: Քննիչի կողմից որոշում էր կայացվել ՀՀ պետական վերահսկողական ծառայության ղեկավար Դավիթ Սանասարյանի պաշտոնավարությունը ժամանակավոր դադարեցնելու մասին։

Համաձայն դատարան ուղարկված մեղադրական եզրակացության՝ Դավիթ Սանասարյանը, հանդիսանալով ՀՀ պետական վերահսկողական ծառայության ղեկավար,  խմբային շահերից ելնելով, իր պաշտոնեական դիրքն օգտագործել է ծառայության շահերին հակառակ, ինչպես նաև չի կատարել իր ծառայողական պարտականությունները:

Զարուհի Դիլանյան