Ի՞նչ առանձնահատկություններ ունի Հայաստանի առաջին Խելացի կանգառը
Խելացի կանգառը Հայաստանում արդեն իրականություն է։ Առաջին խելացի կանգառը տեղադրվել է Էջմիածնում և դարձել է նվեր քաղաքի տոնին։
Խելացի կանգառը տեղադրվել է «Խելացի կանգառ» ՍՊԸ-ի կողմից։ «Խելացի կանգառ» ՍՊԸ-ի հանրային կապերի պատասխանատու Զարուհի Մանուչարյանը 168.am-ի հետ զրույցում նշում է, որ մեկ տարվա ընթացքում Էջմիածնում կլինեն 6-8 կանգառներ։ Երևանում մեկ տարվա ընթացքում ևս նախատեսվում է տեղադրել կանգառներ։
«Շնորհակալ ենք Էջմիածնի քաղաքապետարանին նախաձեռնողականության համար։ Մենք որոշեցինք սկսել Հայաստանի հոգևոր մայրաքաղաքից և կանգառի բացումն էլ համընկավ քաղաքի տոնի հետ։
Մենք բաց ենք առաջարկների համար և պատրաստ ենք գնալ այն քաղաքներ, որտեղ անհրաժեշտություն կա։
Նախագծի հեղինակները 4 ընկերներ են, ում անունները հանրությանը հայտնի չեն, բայց ովքեր հավաքվել են մեկ գաղափարի շուրջ՝ անել ինչ-որ լավ բան հանրության համար՝ դա համատեղելով բիզնեսի հետ»,- նշում է Զարուհի Մանուչարյանը։
Խելացի կանգառի ներդրումը ամբողջությամբ արվել է ՍՊԸ-ի կողմից, բայց այն սեփականության հիմքով տրվել է Էջմիածնի քաղաքապետարանին։ Հետագայում կանգառի հետ տեխնիկական խնդիրների կամ գույքի վնասման դեպքում վերանորոգման հարցերով զբաղվելու է ՍՊԸ-ն։
Խելացի կանգառը ունի հետևյալ առանձնահատկությունները՝
- տեղեկացնում է մոտեցող ավտոբուսի համարի և ժամանման մասին
- ունի wi-fi` անվճար ու անսահմանափակ
- կանգառում կա տեղեկատվական վահանակ՝ զբոսաշրջիկների համար
- սմարթֆոնների լիցքավորման հնարավորություն՝ ցանկացած պահի
- անվտանգության համակարգ, ԱԻՆ կանչի կոճակ
- բանկոմատներ, վճարային ապարատներ,
- աղբի տեսակավորման հնարավորություն
- օդափոխության և ջեռուցման հնարավորություն:
«Ունենք բազմաֆունկցիոնալ վահանակ, որը Հայաստանում միակն է։ Վահանակի վրա ցանկով տեղադրված են հանրային նշանակության վայրերը՝ թանգարաններ, սննդի կետեր, հիվանդանոցներ և այլն։ Ուղևորից պահանջվում է միայն նշել, թե ուր է նա ցանկանում գնալ, և վահանակը ցույց կտա, թե քանի կիլոմետր կա մինչև նշված հասցեն, որ տրանսպորտային միջոցն է գնում այդ հասցեով»,- նշում է Զարուհի Մանուչարյանը։
Սիրարփի Աղաբաբյան
