ԱԳ փոխնախարարը Մինսկոմ ներկայացրել է սահմանների արդյունավետ կառավարման Հայաստանի փորձը
Հայաստանի արտաքին գործերի նախարարի տեղակալ Արտակ Ապիտոնյանը հունիսի 3-4-ը Մինսկում մասնակցել է Բելառուսի Հանրապետության և Միավորված ազգերի կազմակերպության կողմից համատեղ կազմակերպված «Դիմագրավելով ահաբեկչությանը նորարարական մոտեցումներով և նորահայտ տեխնոլոգիաների կիրառմամբ» խորագիրը կրող բարձր մակարդակի միջազգային համաժողովին:
Ինչպես տեղեկացրին ԱԳՆ մամուլի ծառայությունից, համաժողովին բացման խոսքով հանդես են եկել Բելառուսի նախագահ Ալեքսանդր Լուկաշենկոն, ՄԱԿ գլխավոր քարտուղարի ահաբեկչության դեմ պայքարի հարցերով տեղակալ Վլադիմիր Վորոնկովը, ԵԱՀԿ և ԱՊՀ գլխավոր քարտուղարներ Թոմաս Գրեմինգերը և Սերգեյ Լեբեդևը:
Նախարարի տեղակալ Ապիտոնյանն իր ելույթում անդրադարձել է տեխնոլոգիական առաջընթացին զուգահեռ ի հայտ եկող անվտանգային մարտահրավերներին, ահաբեկիչների կողմից նորագույն տեխնոլոգիաների կիրառման վտանգներին:
ԱԳ նախարարի տեղակալը շեշտել է պետությունների առաջնային դերը երկակի նշանակություն ունեցող նորարարական վերջին նվաճումների տարածումը վերահսկելու, դրանց` ահաբեկիչների հնարավոր հասանելիությունը կանխելու գործում, ինչն առավել ռիսկային է այն երկրների պարագայում, որտեղ հանրությունը մոբիլիզացվում է ազգային, կրոնական խտրականության խրախուսման պետական քաղաքականությամբ:
Արտակ Ապիտոնյանը ներկայացրել է սահմանների արդյունավետ կառավարման, անօրինական միգրացիայի դեմ պայքարի գործում Հայաստանի ազգային կարողությունների ամրապնդմանը միտված վերջին նախաձեռնությունները` միաժամանակ ընդգծելով ահաբեկչության դեմ պայքարում միջազգային ջանքերի համադրման կենսական անհրաժեշտությունը: Նա նաև նշել է, որ Հայաստանը մեծապես կարևորում է իր մասնակցությունը ՄԱԿ-ի մասնագիտացված կառույցների, ԱՊՀ, ՀԱՊԿ, ԵԱՀԿ, ԵԽ շրջանակներում ահաբեկչության դեմ պայքարին միտված բազմակողմ համագործակցությանը:
