ՀԱՊԿ-ի երկրների զինվորականները կմասնակցեն Հաղթանակի 75-ամյակին նվիրված մոսկովյան զորահանդեսին
Հավաքական անվտանգության պայմանագրի կազմակերպության (ՀԱՊԿ) երկրների ռազմական գերատեսչությունների ղեկավարները քննարկել են Կենտրոնական Ասիայի իրադրությունը եւ պայմանավորվել են 2020 թվականին իրենց զինվորականներին ուղարկել Հաղթանակի մոսկովյան զորահանդեսին:
Այդ մասին, ինչպես հաղորդել է ՏԱՍՍ-ը, ապրիլի 30-ին ՀԱՊԿ-ի պաշտպանության նախարարների խորհրդի՝ Բիշքեկում կայացած նիստից հետո հայտնել է կազմակերպության գլխավոր քարտուղարի պաշտոնակատար Վալերի Սեմերիկովը:
Սեմերիկովի խոսքով՝ ընդհանուր առմամբ հանդիպման ընթացքում ՀԱՊԿ-ի երկրների ռազմական գերատեսչությունների ղեկավարների կողմից ստորագրվել է 11 փաստաթուղթ, այդ թվում՝ 2019 թվականի երկրորդ կիսամյակում-2020 թվականի առաջին կիսամյակում արտաքին քաղաքականության, անվտանգության եւ պաշտպանության հարցերի շուրջ կազմակերպության երկրների ներկայացուցիչների կոնսուլտացիաների պլանի նախագիծը, ՄԱԿ-ի հակաահաբեկչական ռազմավարության իրագործման վերաբերյալ պաշտպանության նախարարների խորհրդի որոշման նախագիծը եւ ՀԱՊԿ-ի երկրների առաջիկա համատեղ զորավարժությունների անցկացման ժամկետների ու վայրերի մասին փաստաթուղթը, որոնք մոտ ժամանակներս տեղի են ունենալու Հայաստանի, Բելառուսի, Ղրղզստանի եւ Տաջիկստանի տարածքում:
Հանդիպման ընթացքում նաեւ որոշում է ընդունվել ՀԱՊԿ-ի երկրների պաշտպանության նախարարների խորհրդի հաջորդ նիստն անցկացնել Բիշքեկում՝ այս տարվա նոյեմբերին եւ կազմակերպության երկրների զինվորական ստրաբաժանումներին մասնակից դարձնել Հայրենական մեծ պատերազմում հաղթանակի 75-ամյակին նվիրված զորահանդեսին, որը հաջորդ տարի անցկացվելու է Ռուսաստանի մայրաքաղաքում: Բիշքեկում ընթացող հանդիպմանը մասնակցում են Ռուսաստանի, Հայաստանի, Բելառուսի, Ղազախստանի, Ղրղզստանի եւ Տաջիկստանի պաշտպանության նախարարները:
