«ՀՀ-ն կարող է ակնկալել մինչև 3.4% ՀՆԱ ցուցանիշ». Արամ Սաֆարյան
Եվրասիական փորձագիտական ակումբի համակարգող Արամ Սաֆարյանն այսօր լրագրողների հետ հանդիպման ընթացքում ասաց, որ իրենց ակումբի աշխատանքային խումբը պատրաստել է երկու տեղեկանք, որոնք ցույց են տալիս, թե ինչ ունենք՝ որպես ԵՏՄ անդամ նախորդ 5 ամսվա ընթացքում և ինչ սպասելիքներ կան առաջիկայում.
«2017թ. առաջին 5 ամսվա ցուցանիշները ՀՀ-ում և ԵՏՄ անդամ երկրներում ցույց են տալիս, որ մեր երկրները գտնվում են տնտեսական վերելքի ճանապարհին։ Օրերս ՌԴ ԿԲ-ի նախագահը հայտարարեց, որ Ռուսաստանը ոտք է դրել տնտեսական զարգացման նոր փուլի առաջին աստիճանին, կանխատեսվում է լավ տարի Ռուսաստանի համար»,- ասաց նա՝ ընդգծելով, որ ՀՀ-ն կարող է ակնկալել մինչև 3.4% ՀՆԱ ցուցանիշ։
«Այս տարի մենք կանխատեսում ենք, որ հնարավոր է՝ տարին ավարտվի դրական ցուցանիշով՝ ելնելով առաջին 5 ամսվա տվյալներից, իսկ սա նշանակում է, որ ՀՀ-ի համար բացվում է իրապես լուրջ հնարավորություն՝ առաջընթաց զարգացման փուլով գնալու համար»,- նկատեց նա։
Ըստ Սաֆարյանի՝ ՀՀ տնտեսությունը կարող է 2018 և հաջորդ տարիներին զարգանալ էլ ավելի մեծ ցուցանիշներով, քան 2017թ.։ Նրա խոսքով՝ պատրաստի արտադրանքի արտահանման աճը տալու է ՀՀ-ին հնարավորություն՝ բարելավել ՀՆԱ-ն և խոսել տնտեսական լուրջ ցուցանիշների մասին, փոխել բնակչության կենսամակարդակի իրական պատկերը․ «Լավատեսորեն ենք տրամադրված նաև այնպիսի ոլորտների զարգացման հարցում, որոնք առաջներում իսպառ մոռացված էին՝ վերամշակվող ապրանքների արտադրությունը, տեքստիլ արտադրությունը, կոշկեղենի արտադրությունը և նման ոլորտները, որոնք տարիներ առաջ Հայաստանում համարվում էին անհույս մեռած, իսկ վերջին երկու տարվա ընթացքում, ԵՏՄ-ին անդամակցելուց հետո, զարգացման իրական հնարավորություն են ստացել»։
Նա ընդգծեց, որ զբոսաշրջության էական աճ է արձանագրվել երկրում, ինչը, ըստ Սաֆարյանի՝ հնարավորություն է տալիս լրջորեն խոսել ՀՀ-ն զբոսաշրջային երկիր դարձնելու մասին․ «Միայն ՌԴ-ից Հայաստան կապույտ անձնագրով մտնող քաղաքացիների շնորհիվ զբոսաշրջության թիվը ՌԴ-ից Հայաստան առաջին 5 ամսվա ընթացքում ավելացել է 25%-ով։ Սա շատ պատկառելի ցուցանիշ է, որը ցույց է տալիս, որ մեր զբոսաշրջային ենթակառուցվածքները կամաց-կամաց պատրաստվում են մեծ ծավալներ ընդունելու»։
Սաֆարյանի կարծիքով՝ Ռուսաստան-Արևմուտք քաղաքական առճակատումը 2018թ. չի ավարտվելու․ «Կանխատեսվում է, որ մինչև 202թ. սկիզբը Ռուսաստանն ու Արևմուտքն ունենալու են էմբարգոյի քաղաքականության և պատժամիջոցների պատերազմի իրավիճակ։ Այս իրավիճակում Ռուսաստանի հարավի բարեբեր կլիմայական գոտիներ ունեցող երկրների տնտեսվարողները Թուրքիայում, Իրանում, Չինաստանում, Եգիպտոսում և այլն, ունեն հնարավորություն՝ էապես մեծացնելու իրենց մթերքների արտահանումը Ռուսաստան։ Մեր ծավալները շատ համեստ են, բայց մեր համեստ ծավալների շրջանակներում արձանագրում ենք, որ արդեն երկրորդ տարին ունենք գյուղատնտեսական մթերքների մեծացող արտահանում»։
