«Ոչ մի մանդատ արժեքը չունի, եթե…». Կարեն Կարապետյան

«Իմ և Վահրամ Բաղդասարյանի միջև երբեք ո՛չ պայքար է եղել, ո՛չ էլ լինելու է: Մենք ընկերներ ենք»,- այսօր ԱԺ-ում լրագրողների հետ զրույցում հայտարարեց ԱԺ պատգամավոր, ՀՀԿ ԳՄ անդամ Կարեն Կարապետյանը, ով ՀՀԿ ցուցակով ռեյտինգային թեկնածու է Լոռիի մարզում:

168.am-ի հարցին, թե ինչպե՞ս են կիսվելու ձայները, ուսումնասիրե՞լ են, թե ում շանսերն են ավելի մեծ, Կ.Կարապետյանը պատասխանեց, որ ձայները չեն կիսելու, հանրությունը գնում է ընտրության և կողմնորոշվում իր պատկերացումների շրջանակներում. «Դեռ չեմ զբաղվել այդ հարցերով: Ընտրարշավը կսկսվի՝ կզբաղվենք»:

Դիտարկմանը, որ ինքն արդեն մեծ ակտիվություն է ցուցաբերում մարզում, նույնիսկ նույն ընտրատարածքում առաջադրված Վահրամ Բաղդասարյանի տարածք է ներխուժել, Կ.Կարապետյանը նշեց, որ Վանաձորում եղել է միայն մեկ անգամ, դաշտն ազատ է, յուրաքանչյուրը պայքարում է իր համար.

«Ես քարոզչություն իրականացնելու եմ բոլոր այն տեղերում, որտեղ գտնում եմ հարմար: Եվ մնացած բոլոր կուսակցություններն ու անհատները քարոզչություն իրականացնելու են՝ ըստ իրենց նպատակահարմարության: Իմ սկզբունքը հետևյալն է` մենք, այդ թվում՝ նաև ես, ոչ մեկին դեմ չենք աշխատելու:

Մենք ընդամենն աշխատելու ենք մեզ կողմ և հանրությանը ներկայացնելու ենք այն, ինչ արել ենք տարիների ընթացքում` իմ անցյալը, իմ այսօրվա մոտեցումները, իմ վաղվա տեսլականն իմ կարողությունների շրջանակում: Ամենակարևոր սկզբունքը, որ ընտրողին մեսիջ ենք ուղարկելու, կլինի ընդդիմություն, դիմություն, թե մեր կուսակցության անդամների մեջ մրցակցություն` հանրությանը չի կարելի բևեռացնել:

Ընտրությունը` ընտրություն, մանդատը` մանդատ, որևէ մանդատ այդ արժեքը չունի, որպեսզի մենք այս ընտրությունների ընթացքում հանրությանը ծայրահեղ բևեռացնենք: Եթե հանրությունը երկխոսության դաշտում չլինի, այլ` անտագոնիստական, ցանկացած ծրագիր հետագայում շատ դժվար կլինի իրականացնել»:

Հարցին` համաձա՞յն եք, որ ռեյտինգային ընտրակարգը հենց բևեռացման է տանում, Կ.Կարապետյանը պատասխանեց.

«Եթե լինեմ ազնիվ, ապա կասեմ հետևյալը` այդ նախագիծը քննարկելու ժամանակ ես եղել եմ այն անձանցից մեկը, որ դեմ է եղել: Հիմա ունենք այն, ինչ ունենք: Ես դեմ եմ եղել այս մոդելի ընտրությունների անցկացմանը: Խառնաշփոթ է ստեղծվում, ժողովուրդը՝ սոված վիճակում, կարծես թե էդ ժողովուրդն էլ խնդիրներ չունի, բոլորս գնացել ենք հիմա, կոպիտ ասեմ, ժողովրդական լեզվով, սաղին իրար դեմ ենք հանելու, հակասություններ են լինելու, մենք թողնելու ենք գանք, էլի հանգիստ ստեղ նստենք, մարդիկ իրար` ազգ-բարեկամ, թշնամի են դառնալու: Ոչ մի մանդատ դրա արժեքը չունի: Ես 5 անգամ ընտրվել եմ, և մանդատն իմ համար երբեք ինքնանպատակ չի եղել: Մանդատն ընդամենը ես օգտագործել եմ տարածքներին օգնելու համար»:

Կ.Կարապետյանի կարծիքով` ՀՀԿ-ն որոշ հնարավորություն ունի հաղթահարելու որոշակի արգելք, որը կարող է նորից հիմք դառնալ վաղվա մեծամասնության ձևավորման համար: Նա «թեթևամտություն» անվանեց ասելը, որ ՀՀԿ-ն բացարձակ մեծամասնություն կլինի, քանի որ ընտրություններ են, և հանրությունն է որոշելու.

«Էդ բոլորը, որ տենց մեծ-մեծ խոսում են, թող գնան տեղերում նայեն հանրության հոգեվիճակը, սոցիալական վիճակը, Երևանից մի հատ դուրս եկեք, էլի, հետո նոր մեծ-մեծ խոսեք: Ոչ թե դժգոհություն կա, այլ շատ մեծ դժգոհություն կա իշխանություններից և մեծ հիասթափություն կա ընդդիմությունից: Հետևաբար` հանրությունն ինքը կորոշի:

Հանրությունը բազմաթիվ շերտերից է բաղկացած, օրինակ` անապահով խավը մեծամասամբ կաջակցի ընդդիմադիր ուժերին: Այսօր հանրությունը շատ մեծ դժգոհություն ունի բոլոր քաղաքական ուժերից, և հասկանալի պատճառներով, որովհետև լինում են պատվիրված ընդդիմություններ, որ գնում են հանրության մոտ, խոստումներ են տալիս, մեկ այլ դաշտում են աշխատում իբրև ընդդիմություն, մեկ այլ բան են անում: Հանրությունը կամաց-կամաց այս ամեն ինչը հասկանում է»:

Դիտարկմանը, որ իշխանությունը խոստանում է ու չի անում, բայց մնում է իշխանության. Կ.Կարապետյանը պատասխանեց.

«Դուք ընտրող եք, չէ՞: Ես խորհուրդ կտամ՝ չընտրեք: Ովքեր համարում են, որ իշխանությունը ճիշտ չի գործում, և կգտնեք այն ուժը, որ շարժիչ ուժ է, ընտրեք նրանց»:

Ընտրակաշառքների վերաբերյալ պատգամավորը նշեց, որ մարդիկ այդքան միամիտ չեն այսօր և կարող են վերցնել ու քվեարկել նրան, ում ուզում են: Ընտրությունների բոյկոտը, ըստ Կարապետյանի, ոչինչ չի տա, հակառակը` համապետական ընտրություններ են, միակ շանսն է, որ հանրությունն իր խոսքն ասի.

«Եվ եթե մենք իշխանության իբրև ներկայացուցիչներն ենք, թեև այդքան էլ ինձ այդպիսին չեմ համարում, թող այս պահին մեզ պատժեն»:

Թե իրեն ի՞նչ գործիչ է համարում, Կ.Կարապետյանը նշեց, որ ավելի շատ իրեն պետական գործիչ է համարում, քան կուսակցական գործիչ.

«Շատ լավ հասկանում եք, որ կուսակցությունները նեղ կուսակցական շահերից ելնելով՝ այս կամ այն խնդիրների շուրջ այնպիսի մոտեցումներ են ցուցաբերում, որը հակասում է պետության շահին»:

Կ.Կարապետյանը հայտարարեց, որ ՀՀԿ անդամ լինելն իրեն ավելի կխանգարի, քանի որ հանրության մեջ լուրջ դժգոհություններ կան, և, բնականաբար, դա նաև իր ազդեցությունը կթողնի իր վարկանիշի վրա, որի մասին նաև ՀՀ նախագահ Սերժ Սարգսյանը գիտի.

«Բոլորս էլ գիտենք, ոչ ոք միամիտ չէ այսօր: Դուք շատ լավ էլ գիտեք, որ, երբ հանրության մեջ 1 մլն և ավելի ընչազուրկ խավ կա, չկա նման մի երկիր, որ իշխանությանը սիրի: Պատճառները և՛ օբյեկտիվ են, և՛ սուբյեկտիվ: Օբյեկտիվ է` մասսայական թալանը տարիներ շարունակ շարունակվել է, և առաջին անգամ չեմ խոսում, բոլոր այդպիսի մարդկանց ձեռքերը պետք է բռնենք, պետական ինստիտուտներում այդպիսի մարդիկ պետք է տեղ չունենան: Ուզում են լավ ապրեն, իբրև խելոք են, կա բիզնես դաշտ, խնդրեմ, գնացեք ձեր ուղեղը, ձեր պոտենցիալը դրեք էնտեղ, ոչ թե պետական ռեսուրսները, կամ գործիքներն օգտագործեք՝ ձեր անձնական շահերը սպասարկելու համար: Այդպիսի մարդիկ ընդհանրապես պետք է քաղաքական դաշտից դուրս գան»:

Դիտարկումը, որ նախկին վարչապետ Հովիկ Աբրահամյանը գնաց ՀՀԿ-ից, Կարապետյանը «պրովոկացիոն դիտարկում» անվանեց.

«Ես ընդհանուր սկզբունքների մասին եմ խոսում, անհատների մասին չեմ խոսում: Երբ դրա կարիքը լինի, անհատներին էլ կանդրադառնանք, ես որևէ մեկից ո՛չ վախենում եմ, ո՛չ էլ կքաշվեմ: Ես չեմ ասում, որ ես սպիտակ աղավնի եմ, բայց իմ անձնական միջոցները բավարար են, և իմ ընտանիքի համեստ հնարավորությունները միշտ փորձել ենք լռակյաց, առանց ավելորդ էմոցիաների, ինչքան կարողացել ենք՝ օգտագործել ենք»:

Նա չհամաձայնեց, որ ինքն ընդդիմություն է ՀՀԿ-ի ներսում.

«Ընդդիմություն չէ, ցանկացած կուսակցության մեջ պետք է լինեն պրոգրեսիվ և ռեգրեսիվ ուժեր, և դա բնական է: Ոչ միայն միջկուսակցական, այլև ներկուսակցական պայքար պետք է լինի»: