«Ընդդիմությունը չքաղաքականացրեց Գյումրիի դեպքերը, քանի որ նրանց ղեկավարների զգալի մասը ՌԴ-ի հետ հարաբերության ամրացման կողմնակից է»
«Ամենադրականն այն էր, որ ընդդիմությունը չքաղաքականացրեց Գյումրու վերջին դեպքերը, քանի որ նրանց ղեկավարների զգալի մասը Ռուսաստանի հետ հարաբերության ամրացման կողմնակից է, և նրանք էլ հասկանում են՝ եթե սրեն հարաբերությունները քաղաքական ոլորտում, այն, իհարկե, կբերի բացասական հետևանքների»,- այս մասին այսօր լրագորղների հետ հանդիպման ժամանակ ասաց սոցիոլոգ Ահարոն Ադիբեկյանը:
Սոցիոլոգը խոսեց Գյումրու դեպքերից հետո հայ-ռուսական հարաբերությունների մասին՝ հորդորելով՝ չքաղակաքանացնել այն: Նա միաժամանակ նկատեց, թե դա ամբողջությամբ չի ստացվում, քանի որ դրա մասին են խոսում Ռուսաստանի նախագահի և Արտաքին գործերի նախագահի արձագանքը և Պետդումայի պատվիրակության այցը Գյումրի և նրանց արած հայտարարությունները:
Ա. Ադիբեկյանը նշում է, որ այնուհանդերձ սա ունի քաղաքական ենթատեքստ և երկու պետությունների և՛ իրավական, և՛ քաղաքական հարաբերություններում բավականին մութ կետեր կան, որոնք պարզաբանման և լուսաբանման կարիք ունեն:
«Կարծում եմ՝ եթե Պետդուման ընդունի այդ որոշումը, որ Հայաստան գան միայն վճարովի ծառայողները, այլ ոչ թե սովորական զինակոչիկները, նրանց կարելի է վերահսկել, ընտրել, պայմանագիր կնքել, որովհետև նրանք պայմանագրային ծառայողներ են, և դա կարող է բերել նրան, որ, իրոք, Հայաստանում լինեն էլիտար ռուսական զինվորական մասերը, ու մենք ապագայում կխուսափենք նման միջադեպերից:
Պարզ է, որ այդ առումով մենք պետք է նման վերաբերմունք ակնկալենք և այն հայերի նկատմամբ, որոնք Ռուսաստանում հանցագործություններ են կատարում: Չմոռանանք, որ Ռուսաստանի միայն գողական աշխարհում, որոնք հիմնականում կրիմինագեն են և ավելի հաճախ են հայտնվում դատարանում, առաջին տեղում ռուսներն են, վրացիները, հետո ուկրաինացիներն ու հայերը. ամենամեծ խմբավորումները մենք ունենք: Եվ դա չպետք է դառնա պատճառ, որ մեզ կարողանան հետապնդել»,- ասում է Ահարոն Ադիբեկյանը:
168.am-ի հարցին՝ ի՞նչ եք կարծում՝ ընդիմության կողմից Գյումրու դեպքերը չքաղաքականացնելու պատճառը միայն նրանց ռուսամետ լինե՞լն է՝ հաշվի առնելով այն հանգամանքը, որ շատ լավ առիթ էր քաղաքականացնելու, երբ բոլորն ըմբոստացած են իշխանությունների դեմ, Ա. Ադիբեկյանը պատասխանեց. «Եթե ռուսամետ չլինեինք, ի՞նչ պիտի անեինք: Հա, ասենք թե՝ ըմբոստացան Ռուսաստանի դեմ, ի՞նչ եղավ:
Դրանից ի՞նչ արդյունք ենք ստանում, սրեցինք, որոշ ժամանակ հետո մոռացանք: Դեպքերը, որ հայ վարորդի հետ տեղի ունեցավ, բերե՞ց հայ-ռուսական հարաբերությունների սրման՝ ոչ: Ուղղակի, մեզ մի քիչ նսեմացրեցին, որ ցույց տան մեր տեղը Ռուսաստանում, բայց բոլոր դեպքերում, արդեն դրա մասին բոլորը մոռացել են:
Եթե միջպետական հարաբերությունները, նման դեպքերը բերեն լարման, ուրեմն՝ այդ հարաբերությունները բավականին խրթին են, կամ շատ թեթև են: Տասնյակ հանցագործություններ են լինում՝ նույն ԱՄՆ-ում, Ֆրանսիայում… Ֆրանսիայում, որ վերջին սպանությունները տեղի ունեցան, դրանք չբերեցին միջպետական հարաբերությունների. դա դիտվեց որպես Ֆրանսիայի ներքին գործ, որ մենք ենք մեղավոր, որ չկարողացանք պաշտպանել մեր քաղաքացիներին, քանի որ իրավասության սահմանները շատ հստակ են: Մենք պետք է հստակեցնենք այդ սահմանները, որ հետագայում ավելորդ կողմնակի գործոնները չներխուժեն ու մենք կարողանքն այդ հարցերը լուծել»:
