Ուկրաինան պատժամիջոցներ կսահմանի Դոնբասի զինյալներին աջակցող ՌԴ-ի քաղաքացիների նկատմամբ
ZN.UA-ի փոխանցմամբ՝ Ուկրաինայի վարչապետ Արսենի Յացենյուկը կառավարության նիստի բացման ժամանակ հայտարարել է, որ Ուկրաինայի իշխանությունները մտադիր են պատժամիջոցներ սահմանել ֆիզիկական անձանց նկատմամբ, ովքեր հանդիսանում են Ռուսաստանի քաղաքացիներ և աջակցում ու ֆինանսավորում են Ուկրաինայում գործող զինյալներին:
Յացենյուկը հավելել է, որ Ուկրաինայի կառավարությունը ստեղծում է Ռուսաստանի դեմ պատժամիջոցներ սահմանելու հարցերով հանձնաժողով, որում ներկայացված կլինեն ԱԳՆ-ի, էկոնոմիկայի նախարարության ու կառավարության ֆինանսական բլոկի ներկայացուցիչները:
Յացենյուկը հանձնաժողովին հանձնարերել է 10 օրում պատրաստել պատժամիջոցների տակ հայտնվելու ենթակա անձանց ցուցակը: Յացենյուկի խոսքերով՝ Ուկրաինան նոտա է հղելու Ռուսաստանին՝ կապված նրա կողմից ահաբեկչության ֆինանսավորման դեմ պայքարի միջազգային կոնվենցիան խախտելու հետ:
