Ռոբին վան Պերսիի գոլը հավակնում է դառնալ լավագույնը՝ աշխարհի առաջնության ընթացքում (տեսանյութ)
Հոլանդիայի հարձակվող Ռոբին վան Պերսիի՝ Իսպանիայի դարպասը խփած գոլը բուռն կերպով քննարկվում է մամուլում և սոցիալական ցանցերում։ Հիշեցնենք, որ Բրազիլիայում անցկացվող աշխարհի առաջնությունում երեկ ուժերը չափում էին Իսպանիայի և Հոլանդիայի հավաքականները։
27-րդ րոպեին Խաբի Ալոնսոն 11-մետանոց հարվածով առաջ մղեց իսպանացիներին։ Սակայն առաջին խաղակեսի ավարտից 4 րոպե առաջ վան Պերսին գլխի գեղեցիկ հարվածով հավասարեցրեց հաշիվը։ Հաջորդ խաղակեսում հոլանդացիները ևս 4 գնդակ ուղարկեցին Իսպանիայի դարպասը և հաղթանակ տարան 5-1 հաշվով։ Շատերը սա համարում են աշխարհի առաջնության առաջին և խոշոր անակնկալը։
Իսկ վան Պերսիի գոլը՝ իր իդեալական կատարմամբ, այս պահին լավագույնն է։ Թեպետ առաջնությունը նոր է մեկնարկել, և հույս ունենք՝ կլինեն բազում այլ գեղեցիկ դրվագներ։
Նրանք, ովքեր չեն դիտել հանդիպումը, կարող են տեսնել վան Պերսիի գոլն այս տեսանյութում։
