«Լրագրողներ առանց սահմանների» կազմակերպությունը դատապարտել է Միրկադիրովին կալանքի տակ առնելը
Ադրբեջանական Turan լրատվական գործակալության փոխանցմամբ՝ «Լրագրողներ առանց սահմանների» (RWB) միջազգային իրավապաշտպան կազմակերպությունը դատապարտել է Ադրբեջանում հայտնի լրագրող ու քաղաքական մեկնաբան Ռաուֆ Միրկադիրովին կալանքի տակ առնելը:
RWB-ի՝ ԱՊՀ երկրների ու Արևելյան Եվրոպայի հարցերով բաժնի պետ Յոհան Բիրը հայտարարել է, որ Թուրքիայից Միրկադիրովին արտաքսելը եղել է ապօրինի և հետևաբար Թուրքիայի իշխանությունները մասնակից են Ադրբեջանում այդ լրագրողի հալածանքներին.
«Միրկադիրովի դեմ ներկայացված ծանր մեղադրանքները կատարելապես անհեթեթություն ու հիմարություն են: Ինչպե՞ս կարող է լրագրողը փոխանցել գաղտնի փաստաթղթեր, երբ դրանք մատչելի չեն նրա համար»:
Միրկադիրովը մեղադրվում է պետական դավաճանության (Հայաստանի օգտին լրտեսություն կատարելու) մեջ: Ապրիլի 21-ին ադրբեջանական դատարանը նրա նկատմամբ որպես նախնական խափանման միջոց է ընտրել եռամսյա կալանքը:
