ԵՄ-ի Խորհուրդը հավանության է արժանացրել Ուկրաինային մեկ միլիարդ եվրո տրամադրելը
Ռուսական РИА Новости լրատվական գործակալության փոխանցմամբ՝ ԵՄ-ի երկրների արտգործնախարարները հավանության են արժանացրել Ուկրաինային 1 միլիարդ եվրո ֆինանսական օգնություն տրամադրելն ու մաքսատուրքերի չեղյալ հայտարարումը: Այս մասին նշված է ԵՄ-ի Խորհրդի կոմյունիկեում:
Ընդգծվել է, որ այդ մեկ միլիարդ եվրոն կուղղվի Ուկրաինայի տնտեսական կայունությանը և կառուցվածքային բարեփոխումների ծրագրին աջակցելուն: Փաստաթղթում նշված է, որ ԵՄ-ի օգնության հատկացումը տեղի կունենա այն ժամանակ, երբ Ուկրաինայի իշխանություններն ու ԱՄՀ-ը կպայմանավորվեն տնտեսական ծրագրի շուրջ, որը կհաստատվի ֆինանսական համաձայնագրով:
Հայտարարության մեջ ասվում է, որ մեկ միլիարդ եվրո վարկ տրամադրելու մասին այսօրվա որոշումը կլրանցի 610 միլիոն եվրո հատկացնելու մասին որոշումը, որը կայացվել է 2010 թվականին:
