ԱԲ-ն կարող է հայտնվել «ոչ հուսալի ձեռքերում». Չարլզ III-ը զգուշցնում է
Մեծ Բրիտանիայի թագավոր Չարլզ III-ը հայտարարել է «անհապաղ և պատշաճ կերպով հաշվի առնելու գոյաբանական վտանգները»՝ կապված այն բանի հետ, որ արհեստական բանականությունը կարող է հայտնվել «ոչ հուսալի ձեռքերում»: Այս մասին նա ասել է առաջատար տեխնոլոգիական ընկերությունների՝ Nvidia, Google DeepMind, OpenAI, Anthropic ղեկավարների հետ հանդիպման ժամանակ:
Նրա խոսքով՝ ԱԲ-ի հնարավորությունները պոտենցիալ կերպով կարող են օգտագործվել «աղետալի եղանակներով», ինչը վկայում է տեխնոլոգիայի նկատմամբ բավարար վերահսկողության անհրաժեշտության մասին, «քանի դեռ չափազանց ուշ չէ»: «ԱԲ-ի զարգացումը՝ դրա էությունն ու տեմպը, հավասարապես և՛ հետաքրքրում են, և՛ խորապես մտահոգում», — ասել է նա:
Ընդ որում, նա նշում է, որ «մեր մարդկայնությունը պետք է մնա սրբազան», քանի որ այժմ ընդունվող որոշումները կորոշեն ապագա սերունդների աշխարհը:
«Ուստի ձեր առջև ծառացած խնդիրը ոչ թե պարզապես տեխնոլոգիան առաջ մղելն է, այլ ապահովելը, որ այն ամուր կերպով ծառայի մարդկությանը, հասարակությանն ու բնությանը», — հայտարարել է Չարլզ III-ը:
