Նավթի թանկացումը լուրջ խնդիր է դառնում Եվրոպայում. ինչ քայլեր են ձեռնարկվում
Մերձավոր Արևելքում իրավիճակի սրման հետևանքով Սաուդյան Արաբիայից մատակարարումների հետաձգման և չեղարկման ֆոնին եվրոպացի առաջնորդները շտապ միջոցառումներ են ձեռնարկում նավթի գների աճը կանխելու համար։
Եվրոպացի առաջնորդները շտապ քայլեր են ձեռնարկում նավթի գների աճը զսպելու համար, քանի որ Մերձավոր Արևելքում հակամարտության սրման հետևանքով Սաուդյան Արաբիայից մատակարարումները հետաձգվում կամ չեղարկվում են։ Այս մասին հայտնում է Euronews-ը:
Հութիների և իրաքյան ուժերի կողմից իրականացված հարձակումից հետո Սաուդյան Արաբիան ստիպված է եղել ժամանակավորապես դադարեցնել 1200 կիլոմետր երկարություն ունեցող Արևելք-Արևմուտք խողովակաշարի աշխատանքը, որը հանդիսանում է Հորմուզի նեղուցը շրջանցող հիմնական երթուղին։
Նշված խափանումները կարող են խաթարել համաշխարհային նավթի մատակարարումների մինչև 4%-ը, հատկապես այն պարագայում, երբ Սաուդյան Արաբիայում նավթի արտադրությունն օգոստոսին արդեն էապես նվազել էր։ Միևնույն ժամանակ, Brent տեսակի նավթի մեկ բարելի արժեքն այժմ գերազանցում է 113 դոլարը։
Ֆրանսիայի և Իտալիայի համար էներգակիրների թանկացումը վերածվում է ներքին քաղաքական լուրջ հիմնախնդրի, քանի որ քաղաքացիները կառավարությունների գործունեությունը գնահատում են՝ ելնելով սեփական գնողունակությունից։
Ֆրանսիայում էներգակիրների և վառելիքի գնաճն արդեն իսկ խորացնում է սպառողների մտահոգությունը։ Օգոստոսին գնաճը կազմել է 2.7%, որտեղ էներգետիկան շարունակում է մնալ առաջնային շարժիչ ուժը։ Իտալիայում ևս իրավիճակը նմանատիպ է․ օգոստոսին գնաճը հասել է 3.3%-ի, իսկ բենզինի ու դիզելային վառելիքի գները նկատելիորեն բարձրացել են։
