Արևային էներգիայով թռչող ինքնաթիռը շուրջերկրյա ճանապարհորդություն կկատարի 2015 թվականին
Ամերիկյան Associated Press լրատվական գործակալության փոխանցմամբ՝ շվեյցարական Solar Impulse նախագծի հեղինակները ներկայացրել են նույնանուն ինքնաթիռի երկրորդ նախատիպը, որը հաջորդ տարի պետք է իրականացնի շուրջերկրյա ճանապարհորդություն՝ առանց կերոսինի մեկ կաթիլի:
Արևային էներգիան օգտագործող այդ ինքնաթիռի շնորհանդեսը տեղի է ունեցել երեկ Պայերն քաղաքի օդանավակայանում: Երկրորդ նախատիպն առավել հաջող է ստացվել առաջինից: Արևային հազարավոր տարրերով պատված նրա թևի բացվածքը հասնում է 72 մետրի: Դա ընդամնեը 7 մետրով է պակաս А380-ի թևերի բացվածքից: Solar Impulse-ը կշռում է 2.3 տոննա:
Բացի այդ, մեծացվել է ինքնաթիռի արդյունավետությունը, նրա 4 էլեկտրոշարժիչների օգտակար գործողության գործակիցը հասցվել է 94 տոկոսի: Բարելավվել են նաև ինքնաթիռի տեխնիկական առանձնահատկությունները:
