Չինաստանը հուլիսին երեք անգամ խախտել է Հնդկաստանի պետական սահմանը
Ռուսական ИТАР-ТАСС լրատվական գործակալության փոխանցմամբ՝ Չինաստանի զինված ուժերի զինծառայողներն ու ուղղաթիռները հուլիսին վիճելի Լադախ շրջանում (Ջամու և Քաշմիր հյուսիսային նահանգ) երեք անգամ անգամ հատել են Հնդկաստանի սահմանը:
Այս մասին հայտնել են հնդկական ԶԼՄ-ները՝ վկայակոչելով Պաշտպանության նախարարությունում ունեցած իրենց աղբյուրները: Վերջիններիս պնդմամբ՝ չինական բանակի ավելի քան 50 զինծառայող տվյալ շրջան է ներխուժել հուլիսի 16-ին և այնտեղ է գտնվել 3 օր:
Հուլիսի 11-ին էլ Հնդկաստանի օդային տիրույթը երկու անգամ խախտել են չինական ուղղաթիռները: Վերջին շրջանում Չինաստանի հետ սահմանին հաճախակիացած նմանատիպ միջադեպերի հետ կապված՝ Հնդկաստանի կառավարությունը նախորդ շաբաթ հավանության արժանացրեց երեք լեռնային կորպուսների ձևավորումը, որոնք ունենալու են ընդհանուր առմամբ 50.000 զինծառայող:
Նրանք կկազմեն Չինաստանին սահմանակից Հնդկաստանի Արևմտյան Բենգալիա, Ասսամ, Բիհար, Ջամու և Քաշմիր նահանգներում տեղակայված զորքերի նոր խմբավորման հիմքը: Չին-հնդկական ընդհանուր սահմանի երկարությունը կազմում է ավելի քան 4000 կիլոմետր:
