Զինծառայողներն ազատ կլինեն նախագահական ընտրություններում քվեարկելու ժամանակ. Ալասանիա
Грузия Online-ի փոխանցմամբ՝ Վրաստանի պաշտպանության նախարար Իրակլի Ալասանիան այսօր լրագրողների հետ զրույցում վստահեցրել է, որ ոչ ոք չի կարող զինված ուժերին հրահանգել նախագահական ընտրությունների ժամանակ քվեարկել իշխող թիմի ներկայացուցչի օգտին:
Ալասանիայի խոսքերով՝ նախագահական ընտրությունները լինելու են արդար, իսկ ինքը երաշխավորելու է, որ, ի տարբերություն նախկին իշխանությունների, զինված ուժերն ապաքաղաքականացված կլինեն:
Ալասանիան երաշխավորել է, որ կլինի անկողմնակալություն, իսկ դա խախտողները կենթարկվեն քրեական պատասխանատվության: Նախարարն ընդգծել է, որ համապատասխան ցուցումն արդեն իսկ ուղարկվել է զինվորական վերնախավին ու զինծառայողներին:
Նրա խոսքերով՝ արդեն իսկ մեկնարկել է այս տարվա հոկտեմբերի 27-ին Վրաստանում կայանալիք նախագահական ընտրություններին Աֆղանստանում կենտրոնացած վրացի զինծառայողների մասնակցության հարցը:
