Դեղերի գրանցման ընթացակարգը հեշտացնում են
2013թ. հունվարի 1-ից սկսվելու է դեղագործական ընկերությունների GMP (Պատշաճ արտադրական գործունեություն) հավաստագրման գործընթացը: GMP չափորոշիչներին հետևող, ստուգող ու լիցենզիա տվող մարմինը «Դեղերի գրանցման գործակալությունն» է. այն պետք է անդամակցի PIS-ին («Պատշաճ արտադրական պահանջների» ապահովման համաշխարհային կազմակերպություն), որպեսզի Հայաստանում արտադրված դեղերը ճանաչվեն նաև այլ երկրներում:
«Արփիմեդ» դեղագործական ընկերության գլխավոր տնօրեն Վաչագան Ղազարյանը 168.am-ի հետ զրույցում նշեց, որ իրենց ընկերությունը գրեթե պատրաստ է GMP հավաստագրման գործընթացին:
«Մեզ ուղարկվել է նոր հարցաշար՝ կապված ընթացակարգի հետ: Այդ հարցաշարը, կարծում եմ, հաջորդ շաբաթ կհանձնենք դեղերի գրանցման գործակալությանը: Մենք պատրաստ ենք հավաստագրմանը, չի կարելի ասել, որ ամբողջությամբ, որովհետև ամբողջությամբ ոչ ոք պատրաստ չի լինում, բայց 90 տոկոսով պատրաստ ենք: GMP-ն այնպիսի բան է, որ կատարյալ չես կարող լինել, ինչքան մոտենում ես, այնքան ինքը հեռու է գնում, ու դու միշտ պետք է կատարելագործես դա»,- ասաց Վաչագան Ղազարյանը:
Նրա խոսքով` PIS-ին անդամակցելու դեպքում արդեն ընկերություններն ավելի հեշտությամբ կկարողանան դեղեր գրանցել PIS անդամ այլ երկրներում.
«Այն երկրները, որոնք դրա անդամ են, այլևս չեն գալիս քեզ մոտ աուդիտ անելու կամ քեզ չեն մերժում: Հիմա ամեն երկրից էլ դու կարող ես բերել՝ քեզ աուդիտ անեն, բայց ամեն աուդիտը մոտ 100.000 դոլար արժե: Այսինքն՝ անիմաստ է դառնում այդ երկիր գնալ, դեղ գրանցել, վաճառել, եթե միայն թույլտվության համար 100 դոլար պետք է ծախսես: Եթե մեր երկիրը դառնա PIS-ի անդամ, այլևս այլ երկրներից ստուգման գալու անհրաժեշտություն չի լինի, համարում են, որ դու այդ ասոցիացիայի անդամ ես, քո ստանդարտները վերահսկվում են, ու դու հեշտությամբ կարողանում ես դեղեր գրանցել»:
«Արփիմեդ» դեղագործական ընկերության գլխավոր տնօրենի խոսքով`այժմ ընկերությունն արտահանում է իր արտադրանքի 37-40 տոկոսը: Ընկերության արտադրած դեղամիջոցներն այժմ արտահանվում են 5 երկիր՝ Բելառուս, Ուկրաինա, Վրաստան, Ղրղըզստան, Ուզբեկստան: Վաչագան Ղազարյանի խոսքով`այժմ որոշ դեղամիջոցների գրանցման փուլում են Ղազախստանը, Հորդանանը, Եգիպտոսը:
