Իսրայելի հարվածի հետևանքով Լիբանանի տարածքում զոհվել է առնվազն 5 մարդ, այդ թվում՝ երեխաներ
Ըստ Լիբանանի առողջապահության նախարարության տվյալների, կիրակի օրը իսրայելական անօդաչու թռչող սարքի հարվածի հետևանքով Լիբանանի հարավում զոհվել է առնվազն հինգ մարդ, այդ թվում՝ երեք երեխա։
Լիբանանի պետական ազգային տեղեկատվական գործակալությունը (NNA) հայտնել է, որ հարվածի թիրախը, որը հասցվել է Բինթ-Ջբեյլի մոտակայքում, եղել է մոտոցիկլը։
Լիբանանի վարչապետ Նավաֆ Սալամը դատապարտել է հարվածները՝ դրանք որակելով որպես «կանխամտածված հանցագործություն քաղաքացիական բնակչության դեմ»։ Նա նշել է. «Հրադադարի համաձայնագրի երաշխավոր երկրները պետք է ամենաուժեղ ճնշումը գործադրեն Իսրայելի վրա՝ նրա ագրեսիան անհապաղ դադարեցնելու, օկուպացված լիբանանյան տարածքից դուրս գալու և ձերբակալվածներին ազատելու համար»։
Նոյեմբերյան հրադադարի վերահսկումը իրականացվում է մի կոմիտեի կողմից, որի կազմում են ԱՄՆ-ն, Ֆրանսիան, Լիբանանը և Իսրայելը։
Այս շաբաթ Իսրայելը մեծացրել է Լիբանանի դեմ իր հարվածների քանակը և հաճախականությունը։
Հինգշաբթի օրը իսրայելական զինված ուժերը հայտարարել են, որ հարվածներ են հասցրել «Հեզբոլլահ» շարժմանը պատկանող զենքի պահեստներին՝ Լիբանանի հարավի մի քանի շրջաններում։
ԱՄՆ-ի կողմից գործադրվող ուժեղ ճնշման և իսրայելական հարվածների ընդլայնման մտավախության պայմաններում Լիբանանի կառավարությունը ձգտում է զինաթափել «Հեզբոլլահ»-ը։
Լիբանանի արտաքին գործերի նախարար Յուսեֆ Ռաղգին հայտարարել է, որ բանակը երեք ամսվա ընթացքում կավարտի Իրանի կողմից աջակցվող այդ խմբավորման զինաթափումը սահմանամերձ շրջանում։
Իր հերթին, բանակը հայտնել է, որ հինգշաբթի օրը հասցված հարվածների արդյունքում Իսրայելի կողմից հրադադարի ռեժիմի խախտումների թիվը հասել է 4500-ի, և նախազգուշացրել է, որ դրանք կարող են վտանգել «Հեզբոլլահ»-ի զինաթափման գործընթացը։
