«Չեմ կարծում, որ ԲՀԿ-ն այդքան անհեթեթ, անդեմ հայտարարությամբ հանդես գար»
Հարցազրույց ԱԺ ՀՀԿ խմբակցության ղեկավար Գալուստ Սահակյանի հետ
– Բրյուսելում «Բարգավաճ Հայաստան» կուսակցության նախագահ Գագիկ Ծառուկյանը հայտարարել է, թե «անհնար է երկրում պայքարել կոռուպցիայի դեմ, եթե հիմնական կոռումպացված անձինք են այդ պայքարը ղեկավարում»: Արդյո՞ք այս հայտարարության հասցեատերը Հանրապետական կուսակցությունն է:
– Նախ չեմ ուզում այդպես այդ սենսացիային վերաբերվել, որովհետև, կարծում եմ` «Բարգավաճ Հայաստանը» մեկնաբանություններով հանդես կգա, որովհետև հասարակական հետաքրքրության շրջանակում է: Չեմ կարծում, որ մեզ է վերաբերում:
– Բայց չէ՞ որ իշխանությունն է հայտարարել կոռուպցիայի դեմ պայքարելու մասին:
– Իշխանություն ասածը շատ տարածական բնույթ ունի, յուրաքանչյուր պատգամավոր իշխանության ներկայացուցիչ է, որովհետև պետբյուջեից աշխատավարձ է ստանում: Իսկ այդ հայտարարությունը չեմ մեկնաբանի, որովհետև չեմ կարծում, որ «Բարգավաճ Հայաստանը» կամ Գագիկ Ծառուկյանը որոշակիորեն անդրադարձած կլինի այդ խնդրի բովանդակային մասին, որովհետև, ըստ էության, մեկնաբանելի հայտարարություն էր, որը տեղադրվել էր կայքերում, դրա համար կսպասենք մինչև կմեկնաբանեն:
Ընդհանուր առմամբ, չեմ կարծում, որ «Բարգավաճն» այդքան անհեթեթ, անդեմ հայտարարությամբ հանդես կգա, որովհետև այդ անորոշությունը նաև ուղղվածություն չունի: Այդ առումով` մենք լուրջ պատրաստ ենք նման թեմաներին, մասնավորապես, կոռուպցիայի խնդիրն ավելի շատ մենք ենք բարձրացնում:
Փաստորեն, հենց երեկ Գրեկոյի նիստում կոռուպցիայի մասին քննարկումներում Հայաստանը բավականին լավ վիճակում է դիտարկվել բալային առումով, այնպես որ, այն խնդիրները, որոնք այսօր լուծում ենք, և հընթացս արագանում են պրոցեսները, կարծում եմ` նման բովանդակությունը չի կարելի ծավալային ասել: Իհարկե, մենք առաջիններից մեկն ենք, և երկրի նախագահը, որի բազմաթիվ միջոցառումների ուղղվածությունը հենց կոռուպցիայի դեմ պայքարն է:
– Ի տարբերություն Ձեզ, ԱԺ փոխխոսնակ Էդուարդ Շարմազանովը բավական կոշտ արտահայտվեց: Գ. Ծառուկյանի հայտարարությունը որակեց` իբրև ամոթալի հայտարարություն: Ի պատասխան սրա` ԲՀԿ երիտասարդ պատգամավոր Վահան Բաբայանն էլ բոլորին «խորհուրդ» տվեց այսուհետ զգույշ արտաբերել Գ. Ծառուկյանի անունը: Ինչո՞վ է պայմանավորված Ձեր դիրքորոշումների տարբերությունն այս հարցում:
– Վահանը դեռևս նոր է հայտնվել քաղաքական դաշտի կիզակետում, և ամեն ինչը փորձությունների ճանապարհով պիտի ունենա: Եվ միլիոնների անունից խոսել, նշանակում է` ժողովրդին ստրկամիտ համարել, որովհետև թվում է, թե ժողովուրդն ամբողջ օրն իր ընտանիքներում քննարկում է, թե որը որ քաղաքական գործչի նկատմամբ նվիրվածություն և սեր ունի: Դա այդպես չէ, ժողովուրդը խնդիրներ ունի: Ժողովուրդն ում հավատա, նրա հետևից էլ գնալու է:
Բայց դա երբեք չի նշանակում, որ որևէ մեկին պարտավոր է սիրել, հարգել այնպես, որ կուռք դարձնի: Նման իրողությունները մեր հետաքրքրությունների շրջանակից դուրս են: Իսկ Շարմազանովի հայտարարությունում նորից այն մտահոգությունը կար, որ նման հայտարարություն կանխատեսելի չէ, կամ չենք էլ պատկերացնում, որ կարող է լինել: Առավելևս ասեմ հետևյալը, որ մեր նորանկախ Հայաստանի պատմության մեջ երբեք արտասահմանյան շփումներում նույնիսկ ամենակոշտ, ամենասուր ընդդիմությունը նման մոտեցումներով հանդես չէր գա, որովհետև կոռուպցիայի քննարկումը ոչ թե միջազգային կառույցների կամ առանձին հանդիպումների հետևանք է, այլ երկրի ներքին գործն է, իսկ այդ պայքարում, կարծում եմ, մանավանդ վերջին տարիներին, բավականին հաջողություններ ունենք նաև պրոֆիլակտիկայի տեսակետից:
– Պարոն Սահակյան, Գ. Ծառուկյանի բրյուսելյան հանդիպումների ընթացքում սկսել են խոսել նրա հնարավոր առաջադրման մասին: Առաջադրվելու դեպքում ինչպիսի՞ն կլինեն նրա հնարավորությունները:
– Դա կանխատեսում է: Իհարկե, կարող է և առաջադրվել, և ինչի՞ չառաջադրվի որ: Մասնավորապես, նախագահական ընտրություններում, երբ առաջադրումներ են լինում, դա այդպես միանշանակ չէ, որ առաջադրվում են նախագահ դառնալու համար: Դա նպաստում է, որ թիմն ավելի ակտիվանա, ճանաչելի լինի հասարակության մեջ: Կան տարբեր ռազմավարություններ:
Ինչ վերաբերում է մեր թեկնածուին, տարբեր առիթներով ասել ենք, մենք համոզված ենք ոչ թե նրանում, որ Հանրապետականը շատ ուժեղ է, թեև դա ևս առկա է, այլ նրանում, որ ինքը` նախագահը, կարողացել է իր ռեյտինգն ապահովել իր այցերով, իր մեկնություններով, իր փոխհարաբերություններով, իր մտածումներով:
– Իսկ եթե Գ. Ծառուկյանը չառաջադրի իր թեկնածությունը, հավանական համարո՞ւմ եք, որ ԲՀԿ-ն կսատարի ՀՀԿ-ին:
– Մեզ մոտ բաց է, ովքեր ուզում են սատարել, առաջարկում են, քննարկում ենք: Այնպես որ, պրոբլեմ չեմ տեսնում: Եթե չեն սատարի, ուրեմն` չեն սատարի: Գիտեք, սատարելն է վտանգավոր գործիք, որովհետև սատարողն անմիջականորեն նաև վարձ է ուզում սատարման համար: Մենք առուծախի չենք գնում:
– Իսկ Ձեր նշած վարձը կարո՞ղ է լինի վարչապետի պաշտոնը` ԲՀԿ-ին:
– Ոչ, նման հարց չի քննարկվել: Ընդհանրապես որևէ առաջարկություն չենք ստացել, որ քննարկենք:
– Ի դեպ, պարոն Սահակյան, ԱԺ ՀԱԿ խմբակցության ղեկավար Լևոն Զուրաբյանը մեզ հետ զրույցում նշեց, որ Հանրապետականը նահանջել է ՀԱԿ-ի` Մարտի 1-ի հանձնաժողով ստեղծելու նախաձեռնության հարցում: Արդյո՞ք համաձայնության եք եկել ՀԱԿ-ի հետ:
– Իմիջիայլոց, հանրահռչակ Քաջ Նազարի մեկնություններում ինձ դուր է գալիս Դերենիկ Դեմիրճյանի մեկնությունը: Ընդհանուր առմամբ, այդ հանձնաժողովից մենք որևէ ակնկալիք չունենք, բայց որովհետև քաղաքական դաշտ է, փորձեցինք ՀԱԿ-ին տիղմից հանել, որպեսզի հնարավորություն ունենա շարժվել քաղաքականության մեջ, և պայմանավորվեցինք, որ խնդիրը չենք քաղաքականացնում և դիտարկում ենք իրավական հարթության մեջ, այդ դեպքում համաձայն ենք հետագայում այդ հանձնաժողովը ստեղծել: Հենց երկրորդ օրը գնաց հոխորտալով. նապաստակը ո՞նց է գայլից փախնում, հետո սկսում է հոխորտալ անտառում, թե` տես` գայլին ինչ արեցի: Այս պրոցեսի մեջ ընկավ:
– Նապաստակը ո՞վ է:
– Հայրանունն ու ազգանունը չգիտեմ:
