Երգչուհի Անուշիկ Ալավերդյանը վերադարձել է Երևան (լուսանկարներ)
Այս մասին 168.am-ը տեղեկացավ երգչուհուց: «Անհամբեր սպասում էի Երևան գալուն, քանի որ անբացատրելիորեն շատ էի կարոտել քաղաքս: Վերադարձել եմ լավ տպավորություններով, Քաթարից լավ հիշողություններ մնացին՝ հատկապես համերգների հետ կապված: Այնտեղ ունեցանք 100 համերգ: Թիվը մեծ է, բայց յուրաքանչյուր անգամ հաճույքով էի երգում»,- պատմում է Անուշիկ Ալավերդյանը:
Վերջինիս խոսքով՝ Քաթարի հանդիսատեսը շատ լավն էր. «Երաժշտությունից հասկացող հանդիսատես էր, շատ լավ էին մեզ ընդունում: Հիմնականում մեզ լսելու էին գալիս արտասահմանցիները, քանի որ Դոհան տուրիստական վայր է: Գրեթե մեր բոլոր համերգներին հայեր էին ներկա լինում, ինչը մեզ էլ ավելի էր ոգեշնչում»:
Երգչուհին նշում է, որ, քանի որ Դոհան շատ մեծ չէր, նրանք հասցրել են լինել բոլոր գեղեցիկ վայրերում:
Խոսելով առաջիկա ծրագրերի մասին՝ Անուշիկն ասաց, որ մի փոքր հանգստից հետո կվերադառնան երևանյան համերգներին. «Համերգներ կլինեն ոչ միայն Երևանում, այլև մարզերում, բայց միայն մի փոքր հանգստից հետո (ժպտում է.- Գ.Ա.)»:
