Հանգիստ` Կովկասյան Շվեյցարիայում. Travelblog-ի անդրադարձն Արցախի զբոսաշրջային գրավչությանը
Մերձբալթյան երկրներում հայտնի ճանապարհորդական բլոգը` travelblog.lv-ն, մեծ հոդված է նվիրել Արցախին` ուշադրություն հրավիրելով դրա զբոսաշրջային գրավչության վրա: Հոդվածը վերնագրված է հետևյալ կերպ. «Հանգիստ` գոյություն չունեցող երկրում. Լեռնային Ղարաբաղի Հանրապետություն»:
«Կովկասյան Շվեյցարիա. նման անվանում է ստացել աշխարհի ոչ մի երկրի կողմից չճանաչված Լեռնային Ղարաբաղի Հանրապետությունը: Անդրկովկասում գտնվող Արցախի (այդպես են հայերն անվանում ԼՂՀ-ն) լեռները 40 տոկոսով պատված են անտառային զանգվածներով»,- գրում է հոդվածի հեղինակը` նշելով, որ թեպետ երկիրը քաղաքական և տնտեսական մեկուսացման մեջ է և ունի տարածքային խնդիր, սակայն կառավարությունը սկսել է ակտիվորեն զբաղվել զբոսաշրջության զարգացմամբ:
«Վերջին 10 տարվա ընթացքում օտարերկրյա զբոսաշրջիկների թիվը, ովքեր հետաքրքրություն են ցուցաբերել Արցախի նկատմամբ, ավելացել է ավելի քան 4 անգամ` հասնելով տարեկան 16 հազարի»,- նշում է բլոգը` ընդգծելով, որ տարածաշրջանի վերականգնման ծրագրի նպատակով արտերկրում բնակվող հարուստ հայրենակիցների միջոցներով կառուցվել են հարյուրավոր կիլոմետրերով ճանապարհներ, վերակառուցվել ու կանգնեցվել են դպրոցներ, հիվանդանոցներ և բնակելի թաղամասեր, վերանորոգվել են ճարտարապետական կոթողներ:
Կայքը նշում է, որ ԼՂ մուտքը հնարավոր է միայն Հայաստանի ցամաքային տարածքով: «Լեռնային Ղարաբաղի Հանրապետություն մուտք գործելու ժամանակ ձեզ կդիմավորեն մի քանի սիրալիր զինվորականներ, կխնդրեն ցույց տալ անձնագրերը և պարտադիր գրանցվել Ստեփանակերտում, ինչը, ինչպես հետո պարզվեց, տևում է ընդամենը 10 րոպե ու անհրաժեշտ է միայն վիճակագրության համար»,- գրում է հեղինակը:
Նա ներկայացնում է 53 հազար բնակչություն ունեցող մայրաքաղաք Ստեփանակերտը, «Մենք ենք, մեր սարերը» հուշարձանը, Գանձասարի վանքը, Տիգրանակերտն ու այնտեղ իրականացվող հնագիտական պեղումները, Շուշին` Ղարաբաղի հայերի ազատագրման ու անկախության խորհրդանիշը, Ջդրդուզը, «Զոնտիկներ» մինի-ջրվեժը, Դադիվանքը և այլն: Հեղինակի ուշադրությունից չի վրիպում նաև «ժենգյալով հացը»:
«Արցախի զբոսաշրջային գրավչությունը հաստատվել է համաշխարհային առաջատար պարբերականների կողմից: Դրանցից կարելի է առանձնացնել The New York Times-ի լրագրողի հոդվածը` «Տաք ընդունելություն Կովկասում», ինչպես նաև բրիտանական The Guardian-ի կողմից ԼՂՀ-ն ամառային արձակուրդներն անցկացնելու լավագույն երկրների մեջ ներառելու փաստը»,- եզրափակել է հեղինակը:
