Ղրղզստանի կառավարությունը հաստատել է ԵՏՄ-ին անդամակցելու համար անհրաժեշտ արձանագրությունները
Ռուսական ТАСС լրատվական գործակալության փոխանցմամբ՝ Ղրղզստանի կառավարությունը հավանության է արժանացրել ԵՏՄ-ին միանալու մասին արձանագրությունների նախագծերը: Համապատասխան որոշումներն ընդունվել են կառավարության այսօրվա նիստում:
Ղրղզստանի վարչապետ Թեմիր Սարիևը հայտարարել է, որ այդ արձանագրությունները նախորդ տարվա դեկտեմբերի 23-ին (ԵՏՄ-ին Ղրղզստանի անդամակցելու մասին) ստորագրված պայմանագրին կհավելվեն մայիսի 8-ին, ապա դրանք կանցնեն վավերացման ընթացակարգ և դրանից հետո Ղրղզստանը պաշտոնապես կդառնա ԵՏՄ-ի անդամ:
Սարիևը հավելել է, որ ԵՏՄ-ին Ղրղզստանի անդամակցությունն արդեն առաջին օրերից հնարավորություն կտա ապահովել ապրանքների, կապիտալի ու ծառայությունների ազատ տեղաշարժ, ինչպես նաև կլուծի ղրղզ աշխատանքային ներգաղթյալների զբաղվածության հարցը:
Սարիևի խոսքերով՝ Ղրղզստանը մեկ տարում կատարել է ԵՏՄ-ին անդամակցելու վերաբերյալ մեծ ծավալի աշխատանք. «ԵՏՄ-ին անդամակցելու համար անհրաժեշտ ողջ բազան արդեն իսկ հաստատված է»:
