Ռուսաստանն իրավասու է Ղրիմում իր զինվորական կոնտինգենտը հասցնել մինչև 25.000 զինծառայողի. Չուրկին
Ուկրաինական UNIAN լրատվական գործակալության փոխանցմամբ՝ ՄԱԿ-ում Ռուսաստանի մշտական ներկայացուցիչ Վիտալի Չուրկինը երեկ ՄԱԿ ԱԽ-ի նիստում հայտարարել է, որ Ռուսաստանը կարող է Ղրիմում իր զինծառայողների քանակը հասցնել մինչև 25.000-ի: Չուրկինի խոսքերով՝ դա նախատեսված է Ղրիմում Ռուսաստանի Սևծովյան նավատորմի բազավորման մասին համաձայնագրով:
Չուրկինն այդ մասին հայտարարել է այն բանից հետո, ինչ ՄԱԿ-ում Ուկրաինայի ներկայացուցիչ Յուրի Սերգեևը հայտարարել է, որ Ղրիմում Ռուսաստանի ռազմական ներկայությունն ապօրինաբար մեծացվել է մինչև 16.000 մարդու:
Ի պատասխան՝ Չուրկինը հայտարարել է, որ իրենք կարող են Ղրիմում կենտրոնացնել մինչև 25.000-անոց ռազմական կոնտինգենտ. «Դա մեր ներկայության մասին համաձայնագրի մասնիկն է»:
Չուրկինը կտրուկ է արձագանքել ՄԱԿ ԱԽ-ում ԱՄՆ-ի ներկայացուցիչ Սամանտա Փաուերին՝ ընդգծելով, որ վերջինս տեղեկատվություն է ստանում ամերիկյան հեռուստատեսությունից: Փաուերը հայտարարել էր, որ ապացույցներ չկան, որ Ղրիմի և Ուկրաինայի արևելքի մյուս մարզերի բնակչությունը սպառնալիքներ է ստանում Ուկրաինայի նոր իշխանությունների կողմից:
